Allen^a), die disen brief ansehent oder ho^erent lesen, kúndin wir dis nahgeschriben lút O^ertli der elter, Berschi Hůber baid von Eschibach¹, Hainrich Altenweger der elter von Schmerikon², || V^eli Burkart, Ru^edi Claus, Ru^edi Buntschůh von Lentzikon³ vnd vergehint dez offenlich alle sehs gemainlich vnd vnuerschaidenlich an disem brief fúr v´ns v´nser erben vnd alle || v´nser nahkomenden, als wir alle sehs die vorgenempten gemainlich vnd vnuerschaidenlich allez daz habern gelt, dz vss den zwain ho^efen ze Eschibach vnd ze Lentzikon ainem gotz||hus ze Pfa^euers⁴ werden solt, wie vil dez ist, von den erwirdigen herren abbt Johansen⁵ vnd dem conuent gemainlich dez selben gotzhus ze Pfa^euers reht vnd redlich geko^vffet habent in aller der wîse, als der kôff brief wiset vnd sait, den wir von den ietzgenempten herren inne darumb habent, vnd won v´ns den vorgeschriben hofiungern vnd andren hofiungern, die in die egeschriben zwen ho^ef geho^erent, der etwie menger hie nah an disem brief geschriben ist, etklich rehtung an kernen vnd an ziger oder waran dz waz vss dez egenanten gotzhus kelnhof ze Tuggen⁶ ja^eclich^b) giengent, vnd won och wir die obgenanten alle sehs gemainlich vnd vnuerschaidenlich den egenempten kôff mit gůtem willen wissen vnd gunst aller der hofiunger, die in die egeschriben zwen ho^ef geho^erent, getân vnd vollefu^ert habent vnd die och tailhafftig sint ze nement gewesen an der ietzgedâhten rehtung vss dem egenanten kelnhof ze Tuggen, dauon wir obgenempten selb schulden vnd wir dis nahgeschriben lút Haini Búrger von Búrg⁷, Cu^eni Morgen von Schma^erikon, V^eli Altenweger des obgenanten Hainrichs Altenwegers elicher sun vnd Cu^eni Strâsser von Schmerikon alle gemainlich hofiunger der egedahter zwa^eyer ho^ef ze Eschibach vnd ze Lentzikon habent v´ns alle zehen gemainlich vnd vnuerschaidenlich fúr v´ns alle v´nser^c) vnd nahkomen vnd gemainlich fúr alle ander hofiunger der selben zwa^eyer ho^ef entzigen vnd entzihent v´ns mit disem brief aller der rehtung fordrung vnd ansprach, so wir v´nser vordern vnd v´nser erben vnd nahkomen ie gewnnent oder iemer gewinnen mo^ehtent in den egeschriben dez gotzhus von Pfa^euers kelnhof ze Tuggen von dez vorgenanten habern geltz wegen, also dz wir v´nser erben vnd v´nser nahkomend die vorgenanten herren vnd ir nahkomen vnd ir obgenant gotzhus vnd dehainen iro amptman oder ieman von iro wegen vmb dehain rehtunge oder gewonhait, die v´ns oder v´nsern vordem von dez obgenanten habern geltz wegen vntz her beschehen ist oder beschehen so^elt, niemer mêr fúr dis hin angesprechen vmb triben vnd bekúmbern so^ellint noh mugent oder ieman von v´nser wegen, als wir alle zehen gemainlich vnd ieglicher vnder v´ns besunder mit siner trúw an ainez geschwornen aidez statt gelopt vnd verhaissen habint, vnd so^ellint och wir v´nser erben vnd alle v´nser nahkomen der vorgenanten^d) herren vnd ir nahkomen gůt vnd getrúw weren sin darumb an allen stetten an gaistlichen vnd an weltlichen gerihten gen menglichen, wie vnd als dikk sy des notdurfftig sint, mit gůten trúwen ân geua^erd. Vnd dez allez ze warem vnd offem vrkúnd vnd sta^eter sicherhait so haben wir die obgeschriben alle zehen gemainlich vnd ieglicher besunder erbetten den hoherbornen v´nsern gna^edigen herren grâf Donat von Toggenburg⁸, dz er sin insigel fúr v´ns alle v´nser erben vnd nahkomen gehenkt hât an disen brief, vnder das selb insigel wir v´ns vesteklichen bindent zů allen obgeschriben dingen. Wir grâf Donat von Toggenburg vergehint an disem brief, daz wir von ernstlicher bett wegen der vorgeschribner lút v´nser aigen insigel gehenkt habent an disen brief, v´ns vnd allen v´nsern erben vnscha^edlich. Der geben ist ze Vtznang⁹ an sant Valentins tag dez jarez, do man zalt von Cristus gebúrt drúzehen hundert sibentzig vnd aht jar.

Source Fulltext: Chartularium Sangallense IX, Nr. 5633, S. 312-314.