Allen den, die disen brieff ansechend lesend oder ho^erend lesen, kúndent wir die nachgenempten Heinrich der Múller von Bůch¹, Katrin sin elich wirtin vnd Johans ir elicher sun vnd verjechend offenlich mit disem brieff fúr v´ns vnd alle v´nser erben vnd nachkomen, das v´ns die erbern vnd wolbescheidnen Partholome Blarer, Johans der Blarer sin vetter Gerwigs sun vnd V^olrich Ko^echler pfleger der siechsen^a) des spitales ze sant Gallen² an desselben spitals statt redlich vnd recht ze kouffen geben hand die múli vnd múlistat ze Bůch gelegen vor der stat ze sant Gallen, die einhalb stosset an das Eigenbůch³ vnd andrenthalb stosset an des Streiffen gůt, mit hus mit hoff mit stadel mit akern mit wisen mit wasen mit zwy mit holtz mit veld mit wunn mit weid mit stegen mit wegen mit allen rechten nútzen vnd gewonheiten vnd mit aller zůgeho^erd vmb drú vnd drissig pfund pfenning gůter Costentzer múntz mit so^elicher bescheidenheit vnd in dem rechten, das wir vnd alle v´nser erben vnd o^vch nachkomen, in dero hand vnd gewalt die vorgeschriben múli vnd wz darzů geho^ert jemer kumpt, dem vorgedachten spital der siechen ze sant Gallen von der vorgeschribnen múli ze Bůch vnd was darzů geho^ert alle jar jerlich je ze sant Gallen tag zechen schilling pfenning gůter vnd genemer Costentzer múntz vnd vier hu^enr ze rechtem jerlichem zinse a^vne fúrzug vnd a^vn allen iren schaden geben vnd richten sond. Vnd des alles ze vrkúnd der warheit aller der vorgeschribner ding vnd vergicht so haben wir erbetten den ersamen Johansen Schůlmeister burgermeister ze sant Gallen⁴, das er sin insigel fúr v´ns vnd fúr alle v´nser erben vnd nachkomen offenlich gehenkt hat an disen brieff, won wir eigner insigel nit haben, im vnd allen sinen erben gentzlich a^vn allen schaden. Dis beschach vnd ward diser brieff geben ze sant Gallen an dem nechsten samstag nach sant Katherinen tag in dem jar, do man zalt von Cristus gebúrte drúzechenhundert jar, darnach in dem acht vnd sibizigosten jar.

Source Fulltext: Chartularium Sangallense IX, Nr. 5680, S. 347-348.