Allen, die disen brief ansehent alder ho^erent lesen, kv´nden wir Eberhart vnd Hainrichwalther von Ramswag¹ gebrůder vnd iro vettern V^olrich vnd Burkart von Ramswag² gebrůder vnd vergehin des offenlich mit disem brief vmb alle die sto^esse vnd ansprach, so wir gehebt haben mit den edelen herren graf Hugen, graf Albrehten dem eltern, graf Hainrichen vnd grauen Albrehten denn^a) jvngern von Werdenberg³ gebrůdern vnd och si mit vns von der vesti wegen Blatten⁴ vnd von der lút vnd gu^eter wegen, die dar vmb gesessen sint, der die selben herren von Werdenberg ain tail ze Rinegg⁵ ze burger enpfangen hant, die aber v´ns zů geho^erent vnd v´ber die wir vo^egt sigin, der selben sto^esse sigin wir ze baider sit komen vnd gegangen vff dis erberen lúte Cv^onraten Hagen⁶ burgermaister, Cv^onraten Mangolt⁷ den vogt, Jacoben Hůber⁸ den alten burgermaister, V^olrichen Habk⁹ stetamman vnd vff Johansen Swertfúrbel, den man nemmet der Glatz, burger ze Costentz, vnd haben den fv´nfen getrîet ze baider sit die sach vnd sto^esse zerihtend ze den minnen. Die hant v´ns och baidenthalb darvmb verho^ert vnd hant v´ns och nach baider tail klag vordervng vnd ansprach nach red vnd nach wider red mit anander darvmb lieplich vnd frv´ntlich verrihtet vnd verainbert mit den gedingen vnd rehten, als hie nach geschriben stat. Des ersten hant die obgenanten ffv´nf also gesprochen vnd hant v´ns verriht, daz alle angriff, die wir ananderen ze baider sit an lúten vnd an gu^etern getân haben, gar vnd ga^enzlich ab sont sin, also daz dewedere tail dem andern nihtes widerkêren sol, âne alle geuerde. Vnd vmb die lúte, die die selben grauen von Werdenberg gebrůder ze Rinegg ze burger enpfangen hant, v´ber die wir vo^egt sigin, die selben lúte alle sont in varen gen Rinegg inrvnt ainem manod dem nehsten nach dem, als dirre brief geben ist, vnd sont darinne hablich sitzen mit hus vnd mit husrochi âne alle geuerde. Ta^etint daz die selben lúte nit vnd wa^er inen daz nit fůglich vnd weltent si vff den gu^etern beliben vnd die bûwen vnd niessen, darv´ber wir vo^egt sigin, so sont och si v´ns davon stúran vnd dîenen, als si v´ns vnd vnseren vordem von alter da von getân hant, vnd so^elin och wir noch nîeman von v´nseren wegen danne die selben lút nv´t fúro bekv´mberen lúterlich âne alle geuerde. Wa^er aber, daz der selben lúte iht mêr burger ze Rinegg wurdint, die sont och danne alle bi den obgenanten gedingen vnd rehten bestan vnd beliben. Die obgenanten ffv´nf hant och fúro gesprôchen, daz wir noch vnser erben vnd nachkomen mit der obgenanten vesti Blatten wider die obgenanten herren von Werdenberg nit sin sont, alle die wile ich der obgenant Eberhart von Ramswag burger ze Costentz bin vnd die wile daz burgreht weret, daz ich ietz von inen enpfangen hab, lúterlich âne alle geuerde, vssgelassen vnsern herren den . . abt vnd das gotzhus ze sant Gallen, von dem wir die selben vesti zelehen haben, vnd och vnsern herren graf Růdolfen von Montfort¹⁰ herre ze Veltkylch¹¹, dez diener wir sigin, doch in so^elicher wise, wurd der selb vnser herre graf Růdolf krieg oder sto^ess haben mit den obgenanten herren von Werdenberg gebrůdern vnd daz er v´ns danne manti, daz wir wider si mit der selben vesti wa^erint, des so^elin wir nit tůn, wir kvmint danne vor hin fúr ainen grossen rate ze Costêntz vnd legint dem daz fúr, wie wir gemant sigin. Vnd was vns danne der gross rate ze Costentz oder der merer tail vnd^b) inen von der sach wegen mit der vesti haissent tůn, des so^elin och wir danne gehorsam sin, doch daz si v´ns danne darinne also haltint, daz das wider vnseren êren nit sie, als wir dem selben vnserm herren grauen Rudolfen gesworn haben, des so^elin wir dem rate ze Costentz wol getrúwen, alle die wile wir diener sigin dez selben vnsers herren grauen Růdolfs, wenne aber daz selb zil vmb den dienst vsskomet, so so^elin wir doch wider die obgenanten herren von Werdenberg mit der obgenanten vesti nit sin. Vnd sol ich der obgenant Eberhart von Ramswag kains andern herren diener nit werden, alle die wile min^c) burgreht wêret, daz ich jetz von den von Costentz hab, als vor ist beschaiden, won mit ains grossen rates ze Costentz vrlo^vb vnd mit sinem willen vnd gvnst. Wa^er och, daz wir vorbenenten von Ramswag oder vnser erben, ob wir nit werin, die obgenanten vesti Blâtten versetzen oder verkoffen wohin, daz múgent wir wol tůn, doch daz wir alleweg vns selber vnd och den obgenanten herren von Werdenberg gebrůdern disv´ vorgeschriben stuk vnd gedinge vsslassint vnd behaltint, âne alle geuerde. Vnd haben och wir vnd die obgenanten herren von Werdenberg gebrůder ze baider sit bi gůten trúwen den obgenanten ffvnfen verhaissen vnd gelobt, bi disen stukken vnd artikeln vnd bi disem sprûch ze belibend vnd da wider nit zeredent noch zetu^ende noch nieman andere von vnseren wegen in aller der wise, als vor ist beschaiden, luterlich âne alle geuerde. Vnd ze warem vnd offeme vrkv´nd aller dirre dinge haben wir vorbenenten Eberhart vnd Hainrichwalther von Ramswag gebrůder vnd iro vettern baide V^olrich vnd Burkart von Ramswag gebrůder v´nserv´ insigel gehenket an disen brief. Der geben ist ze Costentz, do man von Cristes gebúrt zalt drv´zehenhvndert jar, darnach in dem nv´n vnd sibentzigesten jar, an sant Gregoryen abend dez hailigen babstes.

Source Fulltext: Chartularium Sangallense IX, Nr. 5699, S. 358-360.