Allen^a) den, die disen brief ansehent lesent oder ho^erent lesen, kúnd ich Johans Ko^echler burger ze sant || Gallen vnd vergich des offenlich mit disem brief fúr mich vnd fúr Cůnraten minen brůder von der || zwai hundert pfunt vnd fúnf vnd sibentzig pfunt pfenning gůter Costentzer múnse wegen, die v´ns || die wisen wolbeschaiden der burgermaister der rat vnd die burger gemainlich ze sant Gallen schuldig sint vnd darvmb ich brief¹ von in han, da vergich ich offenlich fúr mich vnd fúr den obgenanten minen brůder, das mich die selben burger von sant Gallen an der selben schulde hundert pfunt vnd zehen pfunt pfenning gůter Costenzer múnse, darvmb sich tag vff den na^ehsten sant Mathyas tag des zwelffbotten, der schierost kumt, erloffen hant, gantzlich vnd erberlich gewert vnd bezalt hânt, vnd darumb so sag ich sú vnd ir nâchkomen fúr mich fúr minen vorgenemten brůder vnd fúr alle v´nser baider erben vmb dú selben hundert pfunt vnd zehen pfunt pfenning gantzlich quit ledig vnd los mit disem brief. Ich vergich o^vch darzů, das die selben burger vnd die stat ze sant Gallen bi dem selben vorgedâhten brief mir noch minem vorgenemten brůder niht mêr schuldig sint denn hundert pfunt vnd fúnf vnd sehtzig pfunt pfenning der vorgeschribnen múnse. Vnd des alles ze offemm wâren vrkúnde han ich der obgenant Johans Ko^echler min insigel gehenkt fúr mich vnd min erben an disen brief. Der ist geben an dem na^ehsten samstag vor sant Mathyas tag des zwelffbotten, do von Cristus gebúrt wârent drúzehenhundert jâr vnd darnach in dem nún vnd sibentzigosten jâre.

Source Fulltext: Chartularium Sangallense IX, Nr. 5695, S. 357.