Wir Chůno von gottes gnâden abt dez gotzhus ze sant Gallen¹ tůn kunt vnd veriehen offenlich mit disem || brieue allen, die in sehent lesent oder ho^erent lesen, daz fúr vns kament ze sant Gallen an dem tag, alz dirre || brief geben ist, do wir offenlich ze geriht sassent, die ersamen fromen Růdolf von Roschach² kylchunherre der || kylchun ze Hagenwille³ vnd Eglolf von Roschach sin brůder, vnd fůgt vnd machot da der selb Eglolf dem obgenanten Růdolf sinem brůder reht vnd redlich mit vnser hant getat gunst willen vnd verhengde willeklich vnd frilich ze ainem rehten gema^echt vnd in rehtes gema^echtes wis diz nachgeschribenen lút gu^eter vnd gelt, die von vns vnd vnserm vorgeschribenen gotzhus sin lehen sint, den hof ze Túffenbach⁴, daz gůt ze Laithůb⁵, daz wilunt Dietrichs dez Welters waz, den hof ze Roschach, den man nemmet der Bu^eler hůb⁶, den zehenden ze dem selben hof, den man nemmet dez Verren zehend, von dem hof ze Kobla⁷ zwai malter baider korn geltes, der Bu^eler biuang ze Roschach, von dem vmbga^enten zehenden ze Roschach ain malter korn geltes, dez Swantz hus vnd hofstat ze Roschach, Ru^edis hofstat ab Egge⁸, den wiger da bi gelegen, daz gůt ze Fúrswendi⁹, dez Gassers tail, v´ss dem selben tail fro Amelyen von Ramswag¹⁰ dez vorgenanten Eglolfs můter ja^erlich vierzehen schilling pfenning Costentzzer múnse gan vnd werden sont, dez Krukkers tail ze Fúrswendi, daz gůt ze Bremenrúti¹¹, den hof in Obern O^vw¹², iren tail dez gůtes ze Swarzenegg¹³, daz gůt, daz man nemmet die Ober Waltstat¹⁴, daz gůt, daz man nemmet Rotenswendi¹⁵, daz gůt ze Krummbach¹⁶, den akker, den man nemmet Kuchimaisters akkers, den wingarten halben gelegen nidnan an dem Bůchberg¹⁷, alz er vsgezaichent vnd gemarchot ist, den torggel, der da bi gelegen ist, den wingarten obnan an dem Bůchberg, den man nemmet der Otterstaler, den wingarten an dem Bůchberg, den man nemmet der Bergman, vnd vsser dez Waggen wingarten an dem Bůchberg den vierden aimer win geltes, vnd diz nachgenemten lút Johansen Zerahoch sin wip vnd irú kint, den Amman von Heriso^vw¹⁸ sin wip vnd irú kint, V^elin Růdrer, Ha^ennin Schnetzzer von Heriso^vw halben sin wip vnd irú kint, dez Sibenaichers wip vnd irú kint, daz Zuberli von Tal¹⁹ vnd sinú geswústrit, V^elin Britschen, Johansen Hasenschrek, Klingenbůchen sin wip vnd irú kint, die Ha^erstinun vnd irú kint. Vnd ist diz alles beschehen vnd vollefu^ert reht vnd redlich mit allen den worten werken vnd geta^eten, so nach gewonhait vnd nach reht darzů gehortent ald ho^eren soltent vnd notdurftig warent vnd alz ez kraft vnd maht sol vnd mag han. Vnd ze vrkúnd der warhait aller der vorgeschribenen dinge vnd vergiht so haben wir der obgenant abt Chůno vnser insigel gehenkt an disen brief. Ich der obgenant Eglolf von Roschach vergich ainer gantzzer warhait aller der dinge, so der erwirdig min gna^ediger herre abt Chůno abt dez vorgeschribenen gotzhus ze sant Gallen von mir da vor an disem brief veriehen hat, vnd ze merer sicherhait der selben dinge so han ich o^vch min insigel gehenkt an disen brief. Der geben ist ze sant Gallen an dem na^ehsten donstag nâch vnser fro^vwen tag ze herbst in dem jar, do man zalt von Cristus gebúrt drúzehenhundert jâr, sibenzig jâr vnd darnach in dem núnden jare.

Source Fulltext: Chartularium Sangallense IX, Nr. 5736, S. 402-403.