Wir^a) Kv^on von gottes gnaden abt dez gotzhus ze sant Gallen¹, daz ane allez mittel zů geho^eret dem || stůl ze Rome, tu^egent kunt vnd veriehent offenlich mit disem brief allen, die in ansehent oder ho^erent || lesen, daz fúr v´ns kam ze Lindow² in der stat an dem tag, alz dirre brief geben ist, der vest man || Hans von Scho^enow³ vnd bat v´ns gar vlizzig, daz wir im vnd sinen erben lihent dis nachgeschriben ja^erlich zins vnd gelt, daz er koft hetti vmb sinen sweher Dietrich von Elnhouen⁴, den man nempt Berlin, daz er von v´ns vnd von v´nserm gotzhus ze lehen hetti, alz im daz och vormals von v´nserm voruarn abt Georyen⁵ gůter vnd seliger gedechtnúzz verlihen wa^er, daz ist vss dem kenhof^b) ze Hohenwiler⁶ sechs scheffel haber ain pfund Costentzer pfening ain swin ald aber siben schiling vnd vier pfening Costentzer mv´ntz da fúr, vss dem maigerhof ze Hohenwiler zwai malter haber ain pfvnd Costentzer pfening vnd zwai hv^enr ze weglo^esi vnd ab dez Gigers gůt hinder dem selben maigerhof sechtzehen schiling Costentzer pfening geltz vnd waz zů dem selben ia^erlichen gelt geho^eret, darvmb erhortend wir sin bet vnd lihent im vnd sinen erben daz obgenant ia^erlich zins vnd gelt mit allen nútzen vnd rechten vnd mit aller zůgeho^erd ze rechtem lehen vnd alz vmb semlich lehen gewonlich vnd recht ist ze lihent, ane geuerd. Vnd dez allez ze offem vnd warem vrkúnd vnd sta^eter sicherhait geben wir vorgenanter abt Kv^on dem vorgenanten Hansen von Scho^enow vnd sinen erben disen brief darúber besta^et vnd besigelt mit v´nserm aigenn angehenkten insigel. Der geben ist ze Lindow an dem nechsten zinstag nach sant Jacobs tag nach Cristus gebúrt drúzehenhvndert iar, donach in dem nv´n vnd sibentzigosten jar.

Source Fulltext: Chartularium Sangallense IX, Nr. 5731, S. 398-399.