Hainricus dei et apostolice sedis gracia episcopus Constanciensis¹ omnibus et singulis presencium inspectoribus subscriptorum || notitiam cum salute. Cum ecclesia parrochialis in Nůlen² nostre Constanciensis diocesis de patronatu hospitalis || oppidi in Rapprechczswil³ existens tantum in bonis fructibus redditibus et proventibus universalibus et particularibus || non habeat nec etiam habere valeat, quod sacerdos ipsi ecclesie preficiendus sustentationem congruam vel minus congruam habere potuerit atque possit, sic quoque propter penuriam huiusmodi ipsa ecclesia, que pacos^a) subditos habuit et habet, et artam parrochiam pluribus annis sacerdote caruerit atque careat de presenti, in ecclesia quoque parrochiali in Rapprehczswil altare beate Katherine virginis⁴ similiter existat, de cuius etiam redditibus et proventibus similiter sacerdos etiam congruam sustentationem nullatenus habere possit, et aliis in hac parte oportunis. Qua propter nobis per consules dicti oppidi et . . procuratores dicti hospitalis fuit humiliter supplicatum, quatenus dictam ecclesiam unire et anectere dignaremur altari predicto, ut sacerdos in dicta prebenda et in dictis beneficiis instituendus preesset et preesse posset dictis duobus beneficiis, ne utrumque ipsorum remaneret, prout pluribus annis remanserunt divinorum solatio destituta. Unde nos de tenuitate dictorum beneficiorum testimonio fidedignorum etiam notoria summaria cognicione previa informati ecclesiam predictam dicto altari, cum sacerdos in ipsis instituendus commodius et tutius in ipso altari quam in ecclesia predicta residere valeat, annectandam et uniendam pro solatio animarum, ne utrumque, ut sic desolatum remaneat, prout pluribus annis remansit, duximus et presentibus annectimus et unimus, ita tamen quod dictus sacerdos in ipsis beneficiis instituendus tam altari quam ecclesie predictis in divinis officiis presit et provideat, qui etiam investituram et institucionem a nobis et nostris successoribus recippiat, subditorum quoque dicte ecclesie, et animarum curat^b) gerat, prout deo et nobis reddere voluerit rationem. Et quia procuratores dicti hospitalis ius patronatus dicte ecclesie ad manus nostras resignarunt et ad consules dicti oppidi Rapprehtzswil patronos dicti altaris transfundi petiverunt, idcirco ius patronatus dictorum beneficiorum transfundimus et transferimus in consules antedictos, qui, quotiens dicta beneficia vacabunt, sacerdotem ydoneum nobis et nostris successoribus presentare teneantur infra tempora a iure statuta, a nobis investituram et institutionem recipiens, cum in antea unita sint et annexa. In cuius rei testimonium sigillum nostrum episcopale presentibus duximus appendendum. Datum et actum Thuregi anno domini M°CCC^mo septuagesimo nono, VIII° ydus iunii, indictione secunda.

Source Fulltext: Chartularium Sangallense IX, Nr. 5715, S. 373.