Allen^a) den, die disen brief ansehent oder ho^erent lesen, kúnd vnd vergich ich Wernher von Búttikon¹ ritter, das ich recht vnd redlich ze ko^vffenne geben han von mir vnd minen erben Heinrich vnd Walther von || Hunwile² gebrůdern edel knechte vnd iren erben dise nachgeschriben gu^eter, der ersten den kelrehoff ze Ko^ellikon³, die vogteye, das meiier ampt ze Ko^ellikon mit allen schůppossen gu^etern zinsen nútzzen vnd zůgeho^erden, so || dar zů geho^erent nu vnd hie nach vnd je^arlich geltend ze zinse zwei vnd zweintzig malter dinkeln eis vierteis minder, zwo^elf malter habern vnd ein viertel, zehen viertel kernen, ein phunt phenningen vnd vier schil||ling vnd vier phenning, achtzig stuffei hu^enr, sechs vnd viertzig vasnacht hu^enr, dar zů twing vnd ban vnd die gerichte, als ich si da har bracht han in dem selben dorf ze Ko^ellikon, dar zů alle we^alde ho^eltzer velde vnd geuilde, wa si gelegen sint, si sigen klein vnd gros, die in den vorgenanten getwing ze Ko^ellikon geho^erent, mit wasser vnd wasserrúnsen vnd mit der sagen ze Ko^ellikon, dar zů die gu^eter, von dien man git ze zinse, die man heisset sunder haber, dar zů alle die gu^eter akker matten húser hofstetten, genemtes vnd vngenemtes besetztes vnd vnbesetztes, mit allen rechten nútzzen zinsen vnd zů geho^erden, so dar zů geho^erent oder geho^eren mag nu oder hie nach, es si funden oder werde noch funden, als ich es har bracht han vnd genossen han vntz vff disen húttigen tag, als diser brief geben ist. O^vch hab ich inen in disen vorgeschriben ko^vff geben dis nachgeschriben lúte, die gese^assen sint ze Ko^ellikon in dem getwing, des ersten Heinrich Swab, Claus Swab, Ru^edin Banwart vnd sin wib, Ru^edin Kúbeler, Weltin Go^esker, der o^vch in disen ko^vff geho^eret, Jennin Seiler, Cu^entzin Seiler vnd sin wib, Peter Je^aglis vnd Heinrich von Zetzwile⁴. Dise vorgeschriben lúte vnd gu^eter alle vnd ieklichs besunder, twing be^anne vnd gerichte, we^alde ho^eltzer velde vnd geuilde mit allen iren zůgeho^erden hab ich den vorgenanten von Hunwile vnd iren erben geben fúr lehen von dem erwirdigen herren dem abbte des gotzhus von sant Gallen. O^vch han ich inen geben des berges driie teil, den man nemmet O^etlisberg⁵, vnd ist der berg eigen. Vnd han dar vmb enphangen von den egenanten von Hunwile sechs hundert guldin fúnf guldin minder gůter vnd gene^amer an gold vnd vollen swe^arer an der gewicht, dero ich von inen gar vnd gantzlich gewert vnd bezalt bin, als ich vergich mit disem brief. Vnd dar vmb entzihe ich mich fúr mich vnd min erben alles des rechten, so ich ie dar an gewan oder ich ald min erben noch gewúnnen mo^echten, vnd setzzen die dikgenanten von Hunwile vnd ir erben in nutzlich vnd ru^ewklich gewer der vorgeschriben lút vnd gu^eter mit allen iren zůgeho^erden ru^ewklich ze besetzzenn vnd ze entsetzzenne ze habenne vnd ze niessenn, als ein man sin lehen billich niessen vnd haben sol vnd als ich es vntz har gehebt vnd genossen han, ane alle geuerde. Ich loben o^vch fúr mich vnd min erben, wider disen ko^vff niemer ze tůnne noch schaffen getan werden weder mit Worten noch mit werkken noch mit gerichte noch ane gerichte, si sigen geislich oder weltlich, noch mit keinen sachen, die ieman erdenken kan oder mag, ane alle geuerde. Were o^vch, daz dien vorgenanten von Hunwile oder iren erben dise vorgeschriben lúte vnd gu^eter alle oder keines besunder anspre^achig wurde von ieman mit geislichem oder weltlichem gerichte oder ane gericht vnd si der ansprach ze schaden ke^amen, den schaden loben ich fúr mich vnd min erben inen vnd iren erben vff ze richtenne vnd ab ze leggenne gar vnd gantzlich ane alle geuerde, wenne es an mich oder an min erben geuordert wirt. Ich loben o^vch fúr mich vnd min erben, dien egenanten von Hunwile vnd ir erben diser vorgeschriben lúten gu^etern be^annen twingen we^alden ho^eltzern velden vnd geuilden mit allen iren zůgeho^erden recht were ze sin fúr lehen, als vorgeschriben stat, an allen den stetten, da si werschaft notdurftig sint vnd es an mich oder an min erben geuordert wirt, ane alle geuerde. Har vmb das dis alles war si ste^atte vnd vnlo^vgenhaft belibe nu vnd hienach, so han ich obgenanter Wernher von Búttikon min ingesigel fúr mich vnd min erben offenlich gehenkt an disen brief. Der geben ist an dem ne^achsten me^antag nach sant Johans tag ze súngichten des iares, do man zalte von gottes gebúrte drúzehenhundert iar vnd sibentzig iar, dar nach in dem núnden jare.

Source Fulltext: Chartularium Sangallense IX, Nr. 5719, S. 377-378.