Allen^a) den, die disen brief an sehent oder ho^erent lesen, kúnde ich Heinrich von Kenelbach¹ vogt der stat ze Rapreswil² vnd vergich offenlich an disem brief, || daz ich an miner gnedigen herren stat der von Toggenburg ze Jonan³ in dem hof offenlich ze gericht sasse, vnd kamen da fúr mich in offen gericht || Hans Húrtzel von Kempraten⁴ ze einem teile vnd Hans Biderman pfleger vnd Cu^eni Giessman meister der armen lúten an der Flů⁵ ze dem andern || teile, vnd offnot Hans Húrtzel mit fúrsprechen, daz er den egenanten pfleger vnd meister ze dez hus handen recht vnd redlich ze ko^vffenne geben hetti vier wisbletz gelegen in der nidren Glaserren⁶, derselben litt ein bletz in der obren Glaserren sto^vst an der Flu^e lúten wisen andrunt an dez Russingers wisen, so litt ein wisbletz ze Lenggisen⁷ sto^vst einint^b) an der Stukinen hanfland vnd andrunt an dez Brunen gůt, vnd hetti inen die vorgenanten vier wisbletz geben fúr ledig vnd los, daz nút darab gat. Vnd hier vmb so hetti Hans Húrtzel von Hansen Biderman vnd von Cu^enin Giessman empfangen ze der armen lúten handen vnd von dez hus wegen fúnfzehen pfunt pfeinnige Zúricher múntz genger vnd genemer, dere er gantzlich von inen gewert were vnd in sinen gůten nutz bewendet hett nach siner vergicht. Vnd also stůnd Hans Húrtzel dar an den stab vnd entzehe sich fúr sich vnd sin erben nv vnd hie nach aller eigenschaft gewaltez rechtunng vordrung vnd ansprach, so er oder ieman von sinen wegen zů den vorgenanten vier wisbletzen ie gehatte oder iemer gewúnnen mo^echte mit geistlichen oder mit welichen^b) gerichten oder mit keinen sachen mit gůten trúwen ane alle geuerde, vnd gab die selben wisbletz vf an den stab vnd vertgetz Hansen dem Biderman vnd Cu^enin Giessman in ir hand ze dez obgenanten huses vnd der armen lúten vnd siechen handen, vnd beschach daz allez, alz gericht vnd vrteil gab. Es sol o^vch Hans der Húrtzel fúr sich vnd sin erben der obgenanten vier wisbletzen recht were sin nach dez hofs sitte vnd gewonheit ane geuerde, also vntz daz die armen lúte an der Flů daran habent sient vnd si ein gewere da bi schirmen mag vnd daz si dar an habent sigint o^vch nach dez hofs recht vnd gewonheit. Vnd dez vnd hier v´ber ze einem warem vrkunde vnd gantzer sicherheit allez, so an disem brief geschriben stat, won daz also vor offem gericht beschehen ist, alz gericht frag vnd vrteil gabe vnd erber lúte erteiltent vff den eyd, daz die důcht, daz ez beschehen were, daz es billich kraft vnd handvesti haben so^elle nv vnd hie nach, da von so han ich der vorgenant Heinrich von Kenelbach vogt min eigen insigel von dez gerichtez wegen vnd durch beider teile bett willen offenlich gehenkt an disen brief, won o^vch daz besunder gericht vnd vrteil gab, daz ich billiche von dem gericht ein brief hier vmb geben so^elte, sider daz beid teil vmb ein brief ba^etint. Dis beschach vnd wart dirre brief geben ze Jonan in dem hof an dem nechsten zinstage nach sant Vrbans tag in dem jare, do man zalte von gottez gebúrte drúzehenhundert jar vnd dar nach in dem nv´ne vnd sibentzigosten jar. Hie bi warent Heini ab Gúntersperg⁸, V^eli Lenggi, Ebli Schúchter, Hans Svmber, Erni Svmber vnd ander erber lút vil.

Source Fulltext: Chartularium Sangallense IX, Nr. 5713, S. 371.