Wir Wentzla^vw von gots gnaden Ro^emscher kúng zů allen ziten merer des richs vnd kúng ze Beheim bekennen vnd tůn kunt offenlich mit disem brief allen den, die in sehen oder ho^eren lesen, das wir haben angesehen sta^et luter trwú vnd o^vch nútz dienst, die v´ns vnd dem riche der erwirdig vnd geistlich Cůno apt ze sant Gallen¹ v´nser vnd des richs fúrste vnd ||
lieber anda^echtiger offte getrúlich vnd vnuerdrossenlich getan hat vnd noch fúrbasser tůn sol vnd mag in kúnftigen ziten, vnd o^vch durch flissiger vnd redlicher dienst vnd ba^et willen des edeln Lutzen von Lando^vw² v´nsers vnd des richs lieben getrúwen haben wir mit wolbedachtem můte rate v´nser vnd des richs fúrsten edlen vnd lieben getrúwen den selben Cůnen vnd alle sines gotzhus lúte, die er ietzunt hat oder hernach in kúnftigen ziten gewinnet, es sye eigen oder lechen phandlút oder vogtlút vnd mit namen die statt ze Wil in Thurgew³ vnd alle, die daselbs sesshaft syen, vnd o^vch die statt ze Wangen⁴ vnd sin lúte ze Appozelle⁵ vnd die ze Huntwile⁶, ze Túffen⁷, ze Trogen⁸ vnd in dem sunderampt⁹ gefryet vnd begnadet fryen vnd begnaden si o^vch mit craft ditz briefes, also das si niemantes fúrbasmer ewenklich, wer er sye vnd in welhen eren vnd wirden er o^vch sye, die egenanten lúte alle mitenander oder besunder fúrtriben vordren ansprechen beclagen bekúmberen vrteilen oder a^echten súlle oder muge fúr v´nser kúnglich hofgericht oder an den lantgerichten ze Rotwil¹⁰ oder an keinen andern lantgerichten oder gerichten, wo die ligen gelegen vnd wie die genant syen. Besunder wer dem egenanten v´nserm fúrsten zůsprechen hat oder gewinnet, der sol das tůn vor v´ns oder v´nserm rate oder vor dem hochgebornen Lútbolten hertzogen ze O^esterich ze Styr ze Kernden¹¹ etc. v´nserm lieben o^eheim vnd fúrsten oder vor sinem rate, wo es im denn aller fůglichest ist. Vnd wer zů sines gotzhus lúten allen ir einem oder mer, er sye man oder wip, zů sprechen zů clagen oder vordrunge hat oder gewinnet, der sol das tůn vor dem richter vnd dem rate der vorgenanten statt ze Wil vnd in andern gerichten, da denn die selben lúte sesshaft syen, vnd recht von inen nemen vnd niergent anderswo, es were denn, das dem cleger oder clegerinen kuntlich vnd offenlich recht verseit wurde von dem egenanten richter vnd rate in der selben statt ze Wil vnd von den andern des egenanten v´nsers fúrsten lúten. O^vch wellen wir von besundern gnaden, das dieselben burger vnd alle des ietzgenanten vnsers fúrsten vnd sines gotzhus lúte mugen offen echter husen vnd hofen vnd mit in alle gemeinschaft haben, also were das ieman der selben echter einen oder zwen vil oder wenig in der vorgenanten statt ze Wil oder in des egenanten v´nsers fúrsten gebieten oder gerichten anfellet, dem sol man ein vnuerzogen recht tůn nach der selben statt ze Wil vnd der ietzgenanten gebiete vnd gerichte gewonheit, vnd als offte si in die mergenanten statt gebiete vnd gericht koment vnd wider darvs, das si nieman ansprichet mit dem rechten, das sol den vorgenanten burgern vnd des egenanten v´nsers fúrsten vnd sines gotzhus lúten allen keinen schaden bringen von der gemeinschaft wegen. Vnd gebieten dar vmb allen fúrsten geistlichen vnd weltlichen grafen fryen herren dienstlúten rittern knechten stetten gemeinden dem lantrichter ze Rotwil vnd allen andern lantrichtern vnd richtern vnd den, die an den lantgerichten vnd gerichten zů den rechten sitzen vnd vrteil sprechen, die ietzunt syen oder in kúnftigen ziten werden, v´nsern vnd des heiligen richs lieben getrúwen ernstlich vnd vestenklich bi v´nsern vnd des richs hulden, das si fúrbasmer ewenklich den obgenanten v´nsern fúrsten den apt keinen siner vorgenanten burger oder lúte einen oder mer man oder wip nicht fúr das egenant hofgericht lantgericht oder ander gericht eischen laden vordren fúrtriben beclagen oder kein vrteil v´ber ir lip oder v´ber ir gůt sprechen oder in die a^vcht tůn súllen noch mugen in deheine wise, vnd wo das gescheche wider dise obgenante v´nser gnad vnd fryheit, die in disem v´nserm brief syen, so nemen vnd tůn wir ab mit rechter wissen vnd kúnglicher mecht volkomenheit aller schuld ladunge eischunge vordrunge ansprache vrteil vnd die a^vcht vnd entscheiden Intern cla^eren vnd sprechen, das si miteinander vnd besunder alle vnkreftig vnd vntugellich sin súllen, vnd tůn si ab vnd vernichten si o^vch gentzklich vnd gar an allen iren begriffungen meinungen artiklen vnd punten, wie si dar komen geben gesprochen oder geurteilet werden oder wurdin. Vnd ob ieman, wer der were, der also wider dise obgenante v´nser gnad vnd friheit frefellichen ta^ete, der vnd die súllent in v´nser vnd des heiligen richs swere vngnad vnd dar zů einer rechten pene fúnfzig phunt lo^etiges goldes veruallen sin, als offte der da wider tůt, die halb in v´nser vnd des richs kamer vnd das ander halbteil dem obgenanten v´nserm fúrsten apt Cůnen von sant Gallen sinen burgern ze Wil vnd allen andern sinen vnd sines gotzhus lúten, die also v´berfarn werdent, gentzklich vnd ane alles minrnusse súllent genallen. Mit vrkúnd ditz briefs versigelt mit v´nser Ro^emschen kunglicher magestat insigel. Der geben ist ze Prage nach gots gebúrte drúzehenhundert jar, dar nach in dem nún vnd sybenzigosten jare, an sant Gallen tag^a), v´nser riche des Beheimschen in dem sybenzehenden vnd des Ro^emschen in dem vierden jaren.

Source Fulltext: Chartularium Sangallense IX, Nr. 5743, S. 410-412.