Wir Wenczlaw von gotis gnaden Romischer kunig zu allen zeiten merer des reichs vnd kunig || zu Beheim embieten Vlrichen Heche, Herman Poppart, Chuncz Halyprunner, Johansen in der Swen||den³, Heinrichen uf der Halten⁴ vnd den lantlewten gemeynlichen zu Apoczell⁵ v´nsern liben getruwen || vnser gnad vnd allis gut. Liben getrwen, vns ist furgelegt von wegen des erwirdigen Chunen aptes zu sand Gallen⁶ vnsern vnd des reichs fursten vnd liben andechtigen, wy das ir ym sulche huldung stewre vnd czinse, die ir ym von recht pfligtig seyt zu tun, nicht leistet richtet noch gebet, als ir vormals seinen voruarn apten von sand Gallen geleistet gerichtet vnd getan habet. Darumb so gebieten wir uch allen myteynander vnd vwer ieglichem besundern beynstlichen^a) vnd vesticlichen bey vnsern vnd des reichs hulden, das ir alczuhant, als ir disem^b) brif ansecht, demselben apt von sand Gallen alle sulche huldung stewre vnd czinse leistet tut richtet vnd beczalet, als ir das seinen voruarn apten von sand Gallen getan habt, also das er darumb icht mer clagen durffe. Wenn tet ir des nicht, so musten vnd wollen wir ym mit vnsern hoffgerichten vnd andern wegen darczu beholffen sein, die ym dorczu not weren, das ir tun must, was ir ym daran von recht vnd gewonheit pflichtig seyt zu tun, als das sein briff, die er von vns vnd vnsern voruarn Romischen kunigen vnd keisern darubir hat, wol aussagen. Geben zu Prag an sand Dorotheen tag, vnserr reiche des Beheimschen in dem sibenczendem vnd des Romischen in dem vyrden jare.

Source Fulltext: Chartularium Sangallense IX, Nr. 5769, S. 440-441.