Wir Wentzlow von gotts gnaden Ro^emscher kúng zů allen zyten merer des richs vnd kúng [zů] Behem bekennen vnd tůn kunt offenlich mit disem brieff allen den, die in sechen oder ho^eren lesen, als wir denn vormals den burgern vnd der gemeine der statt zů sant Gallen von vnrechter vnderwisung so^elich gnad vnd fryhait geta^vn vnd geben haben, das sy alle lúte man vnd frowen uff dem land gesessen, die zů dem stiffte vnd gotzhuse zů sant Gallen geho^eren, in die statt zů sant Gallen [zu burgern] empfachen vnd nemen vnd sy da haben vnd schirmen mo^egen vnd so^ellen in aller der ma^vß, als ob sy hablich in der statt gesessen weren, ouch das niemand dhainen iren burger noch burgerin su^ene oder tochtran, wo die gesessen synd, erben so^elle an dhainem sinem gůtte won der ne^achst erb, der desselben, der abgangen ist, aller ne^achst geerbe ist von sippe vnd [von] der linyen, ouch das die selben burger von sant Gallen von vngenossen^a) wegen niemand trengen noch bekúmbren sol, ouch das sy vmb alle ir geltschuld pfenden vnd angryffen mo^egen on recht vnd das sy die geswornen richter von iren ra^eten vnd burgern nemen mugen, die vmb alle schuld vnd sachen in der statt richten so^ellen. Doch so sygent wir von dem edlen Lutzen von Landow¹ vnserm vnd des richs lieben getruwen vnd ouch andern vnsern vnd des richs vndertanen kuntlich vnderwiset vnd mercken ouch das selber wol, das so^elich gnad vnd fryheit der egenanten statt beide wider vns das heilig riche vnd wider das gemein geschriben recht vnd ouch wider die gnad fryhait recht vnd gewonhait offenlich sy vnd in kuntlich vnd ta^egenlich schaden bringen mo^echte, die der apt der stifft vnd das gotzhus zů sant Gallen von vnsern vorfarn an dem riche Ro^emschen kaisern vnd kúngen von langen zyten herbracht haben, als die brieff wol vssagen, die der selb apt vnd sin gotzhus von den egenanten vnsern vorfarn an dem riche vnd mit namen von sailiger geda^echtnúß dem allerdurchlúchtigisten vnserm lieben herren vnd vatter kaiser Karlen vnd ouch von vns behabt vnd behalten haben. Vnd sunderlichen vns der selb Lutz von Landow vnderwist hat, wie das die selben burger vnd statt zů sant Gallen mit dem abbte vnd gotzhus da selbs sich mit gelubden vnd brieffen [verbunden] vnd verschriben haben, vnd bat vns des demu^etencklich von des erwirdigen Cůnen ietzint apts zů sant Gallen² vnsers vnd des richs lieben fúrsten vnd anda^echtigen wegen, das wir von vnsern kúnglichen gnaden alle so^eliche gnad vnd fryhait, die wir der egenanten statt also zů schaden dem apte vnd dem gotzhus getan hetten, widerru^effen vnd vernichten vnd den egenanten apt Cůnen vnd das gotzhus, die o^vn mittel vnser vnd des richs sind, by iren rechten gnaden vnd fryhaiten behalten vnd schirmen gne^adicklich gerůchen. Des haben wir so^eliche redliche vnd mo^egliche bett durch dienst vnd truw des egenanten Lutzen von Landow vnd ouch durch andacht vnd redliche dienste, die vns vnd dem rieh der obgenant abt Cůne vnd sin gotzhus in kúnfftigen zyten bewisen mo^egen, gnedecklich erho^ert mit wolbedachtem můte vnd gůttem ra^vte vnser vnd des richs fúrsten edlen vnd getruwen alle die obgenanten gnaden vnd fryheiten, die wir der obgenanten statt zů sant Gallen geben haben zů schaden dem apt vnd dem gotzhus zů sant Gallen, vnd ouch alle brieffe handuesten vnd priuilegie, die wir in darv´ber geben hatten, wissentlich widerru^efft vnd vernichtet, widerru^effen vnd vernichten die mit krafft diß brieffs rechter wissen vnd Ro^emscher kúnglicher ma^echte volkomenhait, also das sy alle vnd ir ietliche vnd ouch die brieffe vnd priuilegien, die sy darúber haben, fúrbaßmer in allen iren puncten meinungen vnd artikeln [vnd stucken], so vil vnd so vêr vnd sy dem apt vnd dem gotzhus dhainen irrsal hinderniß oder schaden bringen mugen, dhain krafft noch macht haben so^elle noch mo^ege in dhain wyse, sunder wir wellen vnd meinen mit Ro^emscher kúnglicher ma^echte volkomenhait, das der offtgenant apt Cůn vnd sin gotzhus zů sant Gallen by allen iren rechten fryhaiten gnaden vnd gůtten gewonhaiten, die sy von dem riche herbracht haben, als vorgeschriben sta^vtt, vnd ouch allen iren handuesten priuilegien vnd brieffen, die sy von vns vnd vnsern vorfarn an dem riche Ro^emischer kaisern vnd kúngen darúber hetten, gantzlich vnd vngehindret beliben so^ellen in aller der meynung vnd wyse, als die selben brieff in allen iren puncten stucken maynungen vnd artikeln von wort ze wort begriffen sind, von allermenglichem vngehindret. Vnd gebieten darvmb den burgermeister den ra^eten vnd den burgern gemainlich der statt zů sant Gallen, die nu sind oder in zyten werden, ernstlich vnd vestencklich by vnsern vnd des rychs hulden, das sy dem offtgenanten apt Cůnen vnd sinem gotzhus sweren vnd húlden so^ellen vnuerzogenlich vnd im vnd sinem gotzhus alle die recht vnd gewonhait tůn vnd erzo^egen, als von alter sinen vorfarn a^epten zů sant Gallen ze tůnde gewonlich ist gewesen, vnd in ouch geru^elichen vnd vnuerruckt beliben laussen by allen sinen gerichten rechten twingen bennen ve^allen gela^essen erben erbschafften ersche^atzen stúren zinsen fryheiten vnd gůtten gewonhaiten, als sine vorfarn a^epte daselbs von alter in der statt zů sant Gallen gehebt vnd genossen haben. Vnd gebieten ouch allen fúrsten gaistlichen vnd weltlichen gra^vffen fryen herren dienstlúten rittern knechten landtrichtern vnd andern richtern gemeinden der stetten ma^erckten do^erffern vnd allen andern vnsern vnd des richs lieben getruwen vnd vndertanen ernstlich vnd vesticklich by vnsern vnd des richs hulden, das sy den selben apt Cůnen vnd sin gotzhus an allen iren rechten gnaden fryheiten vnd gůtten gewonhaiten priuilegien handuesten vnd brieffen, als vorgeschriben stat, allecklich oder by tailen nicht hindren noch irren so^ellen in dhain wyse, sunder in getruwlichen von vnsern vnd des richs wegen handthaben schútzen vnd schirmen. Vnd wer da wider te^ate, der so^elt in vnser vnd des richs swar vngnad vervallen sin, vnd als dick das gescheche in ain pene hundert pfund lo^etiges goldes, die halbs in vnser kúngliche camer vnd halb dem egenanten apte vnd sinem gotzhus zů sant Gallen vnlesßlichen vnd o^vn mynnerniß genauen so^ellen. Mit vrkúnd diß briefs versiglet mit vnser kúnglichen maiesta^vt insigel. Der geben ist ze Franckenfurt vff den Meyen nach Crists gebúrt drúzechenhundert jar vnd dar nach in dem achtzigsten jare, an vnsers herren vffart tage, vnser riche des Behemischen in dem sibenzechenden vnd des Ro^emschen in dem vierden jare. [De mandato domini regis P. Jaucen³.]^b).

Source Fulltext: Chartularium Sangallense IX, Nr. 5785, S. 453-454.