Allen^a) den, die disen brief ansehent lesent oder ho^erent lesen, kúnd ich Hûgo Schůlmaister bur||ger ze sant Gallen vnd vergich offenlich mit disem brieue fúr mich vnd fúr alle min erben || von dez hofes wegen ze Albisperg¹ gelegen vnd o^vch von dez zehenden wegen ze Albisperg gelegen, || der o^vch darzů vnd darin geho^ert, die min lehen sint von dem erwirdigen gotzhus ze sant Gallen, daz den selben hof vnd zehenden ze Albisperg die ersamen Bartholome Blarrer, V^olrich Ru^edger vnd Johans Eberli phleger dez spittals vnd der siechen dez selben spittals ze sant Gallen² an dez selben spittal stat mit sinen phenning vnd zv^o dez selben spittals handen reht vnd redlich erko^vft hant von Eglolf dem Blarrer burger ze Costentz vmb hundert phunt vnd vmb drissig phunt phenning gůter Costentzzer múnse, darúber sv´ mich ze ainem getrúwen trager erweit vnd erkorn hant, daz ich den selben ko^vff dez vorgeschribenen hofes vnd zehenden ze Albisperg an iro stat vnd zv^o dez selben spittals handen vf genomen vnd enphangen han, darumb so tůn ich aller ma^englichem ze wissenn mit vrkúnd diz brieues, daz ich noch enkain min erben, ob ich enwa^er, an dem noch zv^o dem vorgeschribenen hof noch zehenden ze Albisperg enkain reht vordrung noch ansprach hant noch haben sont weder von aigenschaft noch von lehenns wegen, won alz wir danne billich tůn súllent von der tragnust wegen. Vnd waz o^vch die selben vorgenemten phleger oder ir nachkomen an dez vorgedahten spittals stat mit dem vorgedahten hof vnd zehenden ze Albisperg tůn oder schaffen wellent nv^ ald hienach, ez sie mit versetzzenn mit verko^vffenn mit besetzzenn mit entsetzzenn oder mit andern dingen, daz wir sv´ darzů fúrderren vnd beholffen súllent sin vnd darzů tůn, wez sv´ v´ns danne bittent, ez sie mit vertgenn oder mit andern dingen, ân fúrzug vnd ân alle geua^erde. Vnd ze vrkúnd der wârhait aller der vorgeschribenen dinge vnd vergiht so han ich Hugo Schůlmaister da vorgenemt fúr mich vnd fúr alle min erben min aigen insigel offenlich gehenkt an disen brief. Der geben ist ze sant Gallen an dem na^ehsten ma^entag nach sant Otilyen tag der hailigen magde, do man von Cristus gebúrt zalt drúzehenhundert jar vnd darnach in dem ahtzigostem jâre.

Source Fulltext: Chartularium Sangallense IX, Nr. 5821, S. 478.