Allen^a) den, die disen brief ansehent oder ho^erent lesen, kúnde ich Hans von Tanhan¹, || Cůnrat von Tunningen² vnd Thoma Butz vo^egt Berhto^vld Stehelis sa^eligen sun Cůnratz || vnd veriehent offenlichen, als Cůnrat von Tanhan burgermaister ze Vilingen³ vnd Ruedi || von Tanhan vor ziten v´berain ko^vmen sint mit Berhto^vld Stehelin sa^eligen dem vorgenanten von des portzehendlis wegen von sant Gallen, also sint o^vch sú mit v´ns v´berain ko^vmen an des obgenanten knaben stat, des vo^egt wir sien, also vnd mit semlicher beschaidenhait, das dem selben Cůnraten Stehelis vnd sinen vo^egten an siner stat der halbtaile des selben zehenden volgan vnd werden sol vnd den obgenanten zwain von Tanhan der anderhalb taile des selben zehenden, vnd o^vch also, daz wir den selben portzehenden gemainlich vnd o^vch vnuerschaidenlich haben vnd niessen so^ellent besetzen vnd entsetzen in die wise, als vorbeschaiden ist, vnd so^ellent schaden vnd fro^vmen dar vmb mit enander han vnd so^ellent o^vch gemainlich den zinse gen sant Gallen von dem selben zehenden vor ab vnd ze dem ersten richten vnd weren a^vn alle gebresten, were aber, ob dehainer dar an súmig were, das der zinse nút dar abe ja^erlichen gericht wu^erde, benimt des die ander dehainen schaden, der sol inen den schaden gentzeliche abelegen vnd vssrichten a^vn alle gebresten a^vn alle geuerde. Vnd diser sache ze offem vnd sta^etem vrkúnde so haben wir die obgenanten vo^egt Cůnratz Berhto^vld Stehelis seligen sun von des selben knaben wegen, des vo^egt wir sien, v´nserú insigel offenlichen gehenkt an disen brief. Der geben ist an dem nehsten mentag nach sant Andres tag, do man zalt von gottes gebúrt drúzehenhundert jar vnd dar nach in dem ain vnd achzigo^vsten jare.

Source Fulltext: Chartularium Sangallense IX, Nr. 5880, S. 541.