Allen^a) den, die disen brieff ansehend lesend oder ho^erend lesen, tůn ich Conrat Brunn||man amptman der wolerbornen miner gna^edigen herren von Tokkenburg kund || vnd vergich offenlich mit disem brieff, daz vff hút disen tag, alz diser brieff || geben ist, do ich ze Sirnach¹ in dem dorff offenlich ze gericht sazz, fúr gericht kam der erber Cůnrat wilend Peters sa^elgen von Braitenlow² elicher sun vnd offnot mit sinem fúrsprechen, daz er mit gůter vorbetrahtung von siner redlichen not wegen redlich vnd recht verko^vft het sinen tail der múlin ze Sirnach gelegen, die man nempt die obern múlin, mit allen rechten nútzen vnd gewonhaiten vnd mit allem dem, so von recht vnd von gewonhait dar zů vnd dar in iendert geho^ert, vnd den selben sinen tail ze ko^vffet^b) geben hab den ersamen sinem lieben stúfvatter Ja^eklin Ambu^el von Maistersrúti³, den man nempt den Obernmúller von Sirnach, vnd siner lieben můter Annen dez selben Ja^eklis elichen husfrowen vnd allen iren erben vmb fúnf phund gůter phenning Costentzer múns, derselben phenning er o^vch gantzlich von in gewert vnd bezalt wa^er an den stetten, da er sinen schinba^eren nutz vnd fromen mit geschaffet hett Vnd bat mich im ze eruarend an ainer vrtail, wie er sich dez selben sines tails der vorgenanten múlin verzihen so^elt vnd den vorgenanten sinem stúfvatter vnd siner můter, die och da beidú vor gericht zegegen stůnden, zů iren handen bringen vnd vertgen so^elt, daz sú daran habend wa^erend vnd alz daz kraft vnd macht haben so^elt vnd mo^echt nach gewonhait vnd nach recht nun vnd hienach. Do ward ertailt mit gemainer vrtail, daz er sinen tail der vorgenanten múlin mit allen rechten gewonhaiten vnd zůgeho^erden, alz vor beschaiden ist, so^elt vff geben mit siner hand an dez gerichtes stab vnd sich dar an aller aigenschafft aller lehenschaft aller manschaft aller gewer aller recht vordrung vnd ansprach, so er dar zů vnd daran ie gehett oder er vnd sin erben v´mer gewinnen kúnden oder mo^echten, gar vnd gentzlich verzig vnd also zů der vorgenanten Ja^eklis Abbu^el sines stúfvatters vnd Annen siner můter handen vertgoti, daz denn dieselb verzihung vnd vfgebung billich kraft vnd macht haben so^elt vnd mo^echt nach recht vnd gewonhait. Vnd also gab och der vorgenant Cůnrat sinen tail der vorgenanten múlin vff an dez gerichtes stab vnd vertgot in den vorgenanten sinem stúfvatter vnd siner můter zů iren handen in aller der wis, alz vor beschaiden ist vnd alz recht vnd vrtail gab. Dar nach battend in die vorgenanten Ja^ekli Abbu^el vnd Anna sin elichú husfrow eruaren an ainer vrtail, ob ich in der vorgenanten verzihung vnd vffgebung nit billich so^elt brieff geben von dez gerichtz wegen, die wurdend in och ertailt, alz vrtail gab vnd recht waz. Dez allez ze offem vrkúnd so ha^vn ich min aigen insigel gehenkt an disen brieff. Der geben ward, do man zalt von Cristus gebúrt drúzehenhundert iar, achtzig iar, darnach in dem ersten iar, an dem na^echsten dunstag nach sant Gallen tag.

Source Fulltext: Chartularium Sangallense IX, Nr. 5871, S. 534-535.