Allen, die disen brief sehent alt ho^errent lesen, kvnden wir graue Růdolf von Habspurch¹ vnt wir fro Elizabeth² sin wirtenne, || dc her Růdolf von Beggenhouen³, her Ru^edege von Werdegge⁴ vnt Wisse Wissen seligen svn von Zurich fur vns kamen || vnt vns die vogetei, die siv hatten ze lehen von vns fron Elizabethen, der gu^etern ze Rapliswende⁵, dc einlef stuke giltet, || an dem Strike, de sibenzehen stuke giltet, dv gu^eter Walther Wisse bvwet, an Gartenbu^ele, dc einlef stuke giltet, dc der Gepler het, ze Hargarten, dc acht stuke giltet, dc der Rube bvwet, dc in der parrochia ze Richtliswile⁶ lît, de zwei stuke giltet, dc der Schurman bvwet, vnt o^vch die vogetei, die si hatten vber die lvte, die dv selben gu^eter bvwent vnt vf dien selben gu^etern sizzent, vf hant gegeben an vnser hende in allem dem rechte, als siv die vogtei vber dv vorgenanden gu^eter vnd lvte hatten, also hein wir die vogetei vf genomen von inen, vnt durch ir bette so hans^a) wirs verlvwen Herman Menidorf, Růdolf Spichwart, .. dem Guller, Růdolf Snellen vnt Růdolf von dem Brunnen ze rechtem man lehen vnt in allem dem rechte, als o^vch siv die vogetei hatten, also dc wir von dien lvten, die vf dien gu^etern sizzent, noch von ir nachkomen, so siv nicht sint, die vf dv gu^eter koment, niemer dekein stvr geuorderen noch nemen svn, die wil siv vf dien gu^etern sizzent, vnt dc wir siv nicht besweren svn mit keinem dinge, vnt dc ir lip vnt ir vamt gůt sol lidig vnt fri sin, wan o^vch die vorgenanden her Růdolf von Beggenhouen, her Ru^edege von Werdegge vnt Wisse die vorgenanden vogtei der gu^etern vnt der lvten hatten in dem selben rechte. O^vch het her Ru^edege von Werdegge gelopt, dc er der vogtei, der gu^etern vnt der lvten wer sol sin gegen rechte, als da vorgeschriben ist, swa alt swenne die sin bedurfen, dien wirs nv verlvwen han. Vnt ze einem offennen vrkvnde alles, so da vorgeschriben ist, geben wir disen brief vnt o^vch der von Werdegge besigelt mit vnsern ingesigeln offenliche. Diz geschach vnt wart o^vch dirre brief gegeben Zurich, in der stuben des huses Johans Wolfleipschen, do von gottes geburt waren zwelfhundert vnt nvnzeg jar vnt dar nach in dem nvnden jare, an dem nechsten mentag vor mitter vasten. Vnt meister V^olr. Wolfleipsch chorher Zurich, her Růd. chilcherre von Ettiswile⁷, her Hug von Landenberch⁸ ritter, Johans Wolfleipsch, Chv^onr. der truchsez von Einsidellen⁹, her Albrecht ritter von Vrinchon¹⁰, Růd. Twingenstein, Růd. ab dem Turn¹¹, Heinr. vs der Owe¹², Berchtolt von Bossinchon¹³ vnt ander vilgezugen.||
Ich her Ru^edege ritter von Werdegge der vorgenande vergich an disem briue^a), swc da vorgeschriben ist, dc dc war ist vnt geschehen ist, als da vorgeschriben stat. Vnt ze einem offennen vrkvnde henk ich min ingesigel an disen brief an dem tage der vorgeschriben jarzal.

Source Fulltext: Chartularium Sangallense V, Nr. 2479a, S. 527-528.