Allen, die disen brief sehent alt ho^erent lesen, kunden wir fro Elisabeth grauen Růdolfs frowe von Habspurg greuinne von Rapreswile¹, das her Heinr. von || Hofstetten² ritter mit vnser vnt grauen Růdolfs des vorgenanden willen vnt gunst sin hof ze Wurmspach³, der anuat an dem Erle vnt gat an || die Binzhaltun, vnt Binzhaltun vf vnz an die Brant vnt die Owe almeinde in Buchschilcher holz, in Wagner holz, in Linsche⁴, den hof er von vns II ze lehen hat, ze ko^vffenne hat gegeben dien erberren frowen der .. ebtischinnen vnt dem conuent der swesteron von Wurmspach⁵ des ordens von Zitel mit akern vnt mit wisen, mit holze vnt mit velde, mit wunne vnt mit weide vnt mit allem dem, so ze dem houe ho^ert vnt das er dar bracht het, vmb drisseg march silbers Zurich genges vnt gebes, vnt ist o^vch des alleklich von in gewert, vnt vergicht des alleklich an disem brieue, vnt het den selben hof vf gegeben an vnser hant, vnt dur sin bette so hein wir mit des vorgenanden vnsers wirtes grauen Růdolfs hant gunst vnt willen die eigenschaft des selben houes vf gegeben an der vorgenanden .. ebtischinnen von Wurmspach hant ze ir vnt ir conuentes vnt ir klosters wegen für lidig eigen^a). O^vch het her Heinrich der vorgenande von Hofstetten gilobt, das er die vorgenanden . . ebtischinnen noch ir conuent noch ir kloster niemer angespreche vmb den vorgenanden hof noch sü darvmb niemer gemu^eie an geischlichem noch an weltlichem gerichte, vnt bindet o^vch dar zů sin nachkomen vnt sin erben an disem brieue. Vnt ze einem offennen vrkunde alles, so da vorgeschriben ist, geben wir inen disen brief mit vnser vnt grauen Růdolfs vnt hern Heinrichs von Hofstetten ingesigel offenlich besigelt. Dirre brief wart gegeben ze Rapreswile⁶, do man von gottes geburte zalte^b) truzehenhundert jar, dar nach in dem ersten jare, an dem nechsten dornstage nach sant Hylarien tult.||
Wir graue Růdolf von Habspurg der vorgenande veriehen, swas da vor geschriben stât^c), das das geschehen ist mit vnser hant gunst vnt willen, vnt des ze einem offennen vrkunde henken wir vnser ingesigel an disen brief an dem tage der vorgeschriben jar zâl.||
Ich her Heinrich von Hofstetten ritter der vorgenande vergich offenlich an disem brieue, swas da vorgeschriben ist, das das war ist vnt geschehen ist, als da vorgeschriben stat, vnt ze einem offennen vrkunde des vorgeschriben henke ich min ingesigel an disen brief an dem tage der vorgeschriben jar zal.

Source Fulltext: Chartularium Sangallense V, Nr. 2525, S. 24-25.