In^a) gotis namen amen. Wir Rudolf, Fridereich vnd Leupolt¹ von gotis gnaden herzogin ze^b), ze Steyr, herren ze Chreyn, in der Maren² vnd ze Portenaw³, grauen || ze Habspurch vnd van Chyburch vnd lantgrauen ze Elsazze chvnden allen den, die disen prief an sehent oder ho^erint lesin, die nv lebent vnd hernach kvnftig sint, || wan die erbern herren abt Wilnham^c)4 vnd alle der conuent dez gotzhaus ze sant Gallen, daz da gelegen ist in dem pistv^om von Chostentz, mit gemainein rat vnd willen || vûr sich vnd vur ir nahkomin vnd auch fvr ir gotzhaus sich entzigen hant gegen vns vnd vnsern průdern vnd vnsern nahehomin vnd auch gegen dem edeln Johans vnsers vettern, herzogen Rudolfes⁵ seligin svn, alles dez rehtes vnd aller der ansprache, die sei hant ald mo^ehtin haben gegen vns ald gegen vnsern erben vmb ligendes oder vmb varndez gůt, leute vnd reht, stêtte oder bvrge, chirchensaetzze oder vmb dehainer slahte sache, doch so haben wir vns vûr vns vnd vûr vnser prv^oder vnd vûr vnsers vettern svn Johansen, noch der abt vnd der conuent van sant Gallen niht verzigin vmb daz gotzhaus ze Yttingen⁶, wan wir vnd vnser brůder vnd vnsers vettern svn Johans vnd auch der abt vnd der conuent von sant Gallen svln baidenthalben vmb daz vorgenant gotzhaus ze Yttingen in dem reht beleiben, als wir sein. Vnd wand sei auch sich entzigen hant aller chlage vmb den schaden vnd varn hant gelan lûtterleich allen den schaden, der in ald ir gotzhaus an dehainer slahte gůte ligenden oder varnden oder an leuten geschehen ist van vnserm enen seligen dem Ro^emschen chvnige Rudolfen, seinen heifern ald seinen ratgeben, van vnserm herren vnd vâter dem Ro^emschen chvnige Albrehten, van vnserm vettern seligen herzogin Rudolfen vnd van irn heifern ald van ir ratgeben mit behahtem^c) mv^ote vnd mit gůtem rate vnd auch mit gantzem willen vûr sei vnd vûr alle ir nahehomin vnd ir erben, so suln vnd wellen wir dur got vnd der vorgenanten abt vnd convent bette vnd willen vnd auch ze widerlegen daz vorgenant enzihen die stat vnd die bvrch ze Swarzenbach⁷ haizzen brechen, also daz wir noh vnser prv^oder noh vnsers vettern svn Johans ald vnser aller nachomen vnd erben noch di vorgenanten der abt vnd der^d) conuent dez gotzhaus van sant Gallen vnd auch ir nahchomen niemer mer dehain bvrch, stat oder vest da gebvwen svln. Ez svln auch die vorgenanten abt vnd conuent dez gotzhaus van sant Gallen vnd auch ir nahchomin die stat ze Wile⁸ wider pavwen vnd den margt der stat wider haben, also daz wir vnd vnser průder vnd vnsers vettern svn der vorgenant Johans noh alle vnser erben noch ieman vnser amptleute noch vnser leute van vnsern wegen den pav der stat noh den margt nicht werren svln noch wenden, vnd svln daz behalten an alle geverde. Allez daz da vor geschriben stat, daz haben wir vûr vns, fvr vnser průder vnd fvr vnsers vettern svn Johansen vnd auch vûr alle vnser erben vnd vnser nachomen bedehtichleich, lvterleich vnd gentzleich an alle geverde genâmzet ewichleich stête ze behalten, als ez da vor geschriben stat, vnd da wider niemer iht ze tv^en. Vnd ze ainer sta^eten vnd ewigin vestnvnge aller der dingen, die da vor geschriben stant, als sei da vor verschriben sint, haizzen wir diz gegenwurtigen hantveste besigeln mit vnserm daz ist herzogin Rudolfs von O^esterreich vnd von Steyr insigel, da genv^ogt^e) vns herzogin Fridereichen vnd Levpolten auch wol mit. Diser prief ist geben ze Wienne, do van Kristes gebvrte waren drevzehen hvndert jar, dar nach in dem ersten jar, an sant Gallen tag.

Source Fulltext: Chartularium Sangallense V, Nr. 2539, S. 36-37.