Omnibus presentes litteras inspecturis Diethelmus de Ramstain¹ rector ecclesie in Stamhain² Const(antiensis) dyocesis subscriptorum noticiam cum salute. Considerata ecclesie mee predicte utilitate || evidenti habitoque tractatu sollempni et premisso cum reverendis in Christo Hainrico divina permissione abbate³ totoque conventu monasterii sancti Galli predicte dyocesis, quibus ius patronatus predicte ecclesie || in Stamhain dinoscitur pertinere, de consensu expresso eorundem et auctoritate ipsisque approbantibus et ratificantibus pro me meisque successoribus in ecclesia predicta imperpetuum et predicta ecclesia mea II in Stamhain realiter decimam opidi in Wilisdorf⁴ et proventus omnes ac singulos eiusdem decime cum omni potestate locandi eandem et cum omni potestate instituendi et destituendi in eadem ipsiusque decime pertinenciis et attinenciis ac iuribus universis, que cum pertinenciis eisdem ecclesie mee predicte hactenus pertinebant, quamque pro censu annuo Vlricus de Aigoltingen⁵ et Berh. frater suus a me et a meis predecessoribus et ab ecclesia mea predicta hactenus iure hereditario possiderunt, quique ad manus meas iuri, quod habebant in ipsa decima, pro se suisque heredibus sollempniter renunciarunt, hon(orandis) in Christo .. priorisse et conventui monasterii in Diessenhoven⁶ ipsorumque monasterio ac communibus usibus eorundem imperpetuum et realiter applico, dono, trado irrevocabiliter et annecto et in ipsas ipsarumque monasterium realiter et imperpetuum transfero habendam et possidendam incommutabiliter suisque usibus prout maluerint applicandam. Hoc adiecto, ut michi meisque successoribus in ecclesia predicta imperpetuum sex modii tritici, quinque modii siliginis et duo malt(era) avene mensure in Diessenhoven⁷ annis singulis in festo beati Galli dentur et presententur a memoratis .. priorissa et conventu vel a procuratore earundem, nulla defalcacione eiusdem census facienda tempore grandinis vel in aliis casibus, in quibus census debitus ex locacione decimarum de iure vel consuetudine terre tolli, extingui vel minui consuevit, hoc eciam adiecto, quod si predictus census quolibet anno in festo beati Galli et a festo Galli usque ad festum beati Martini proximo venturum prenotato Dieth. de Ramstain rectori ecclesie in Stamhain vel suis in eadem ecclesia successoribus non fuerit integraliter exsolutus, eo ipso prefata decima vacare debet eidem Dieth. vel suis successoribus nomine ecclesie in Stamhain superius nominate et predicta .. priorissa et conventus monasterii in Diessenhoven ac ipsum monasterium cadere debent ipso facto ab omni iure, quod ipsis in eadem decima competit ex vi concessionis seu donacionis prehabite vel eciam ex vi aliorum, que superius sunt expressa, adhibitis per me in omnibus et singulis supradictis verborum ac gestuum sollempnitatibus debitis et consuetis. Et in evidenciam premissorum ipsorumque perpetuam et inviolabilem firmitatem presens instrumentum trado memoratis .. priorisse et conventui sigillorum reverendi patris ac domini mei H. dei gratia Const(antiensis) episcopi⁸ necnon memoratorum .. abbatis et conventus monasterii sancti Galli meique robore communitum. Nos Hainricus dei gratia abbas totusque conventus monasterii sancti Galli predicti patroni ecclesie antedicte recognoscentes omnia et singula supradicta de nostro consensu nostraque auctoritate rite et legitime fore peracta, eadem omnia et singula pro nobis nostroque monasterio et successoribus ac pro ecclesia supradicta realiter et imperpetuum inviolabiliter duratura presentibus approbamus et ratificamus et auctoritatem nostram impertimur eisdem ipsisque irrevocabiliter consentimus, appendentes in evidenciam huius facti presentibus sigilla nostra. Nos itaque H. dei gratia Const(antiensis) episcopus supradictus omnibus et singulis suprapositis et conscriptis coram nobis rite et racionabiliter peractis consensum nostrum expressum et auctoritatem ordinariam impertimur ipsaque duratura realiter et imperpetuum approbamus et presentis scripti patrocinio communimus, appendentes ob firmitatem inviolabilem eorundem presentibus sigillum nostrum. Actum apud sanctum Gallum, anno domini M°.CCC° tercio, IIII°. non. marcii, indic. prima.

Source Fulltext: Chartularium Sangallense V, Nr. 2582, S. 67-69.