In^a) gotez namen amen. Allen, die^b) nu oder har nach dizen brief sehent oder ho^erent lêzen, kund ich herr Heinr. der vogit von Fridingen¹ ein ritter, || daz Anna Cůnr. von Tůhtlingen² elichu wirtin vnd^c) .. ir sun, du min eigen sint, vmbe zwei phunt Constencer muncze || vnd vmbe aht Schillinge phenninge der selbun muncze, der si gewert sint vo^elleclichen vnd die si hant becheret in ir bezzoren nucz, hant || mit ir rehten vogtez hande Cůnr. dez vorgenanden von Tůhtlingen vnd o^vch mit im uf geben vnd sich erzigen^d) mit min er gunst, getat, willen vnd mit miner hant für sich vnd fur alle ir erben vnd ir nachkomen rehte vnd elichen an dez erwirdigen herren hern Cůnr. dez probstez von Ittingen³ dez munsters in Constencer bistům sant Augustines ordens hant ze dez selben munsters handen allez dez erbez vnd allez dez rehtez, so si hatton oder haben mohton oder nohc han mo^ehtin an der schůpoz, du ze Obern Stamhein⁴ lit, die man da nennet du schůpoz in dem bongarten, die si hatton ze erbe^e) von dem selben munster ze Ittingen, dar och du eigenschapht der selbun schůpoze ho^eret, vnd hant o^vch widerseit allem gerihte geischlichem vnd weltlichem, worten vnd werchen für sich vnd ir erben vnd o^vch allem dem mit gancer truwe, da mitte becrenket, zerdrennet oder besweret werden mo^ehte bi teile oder an allem, swaz har an gescriben stat, vnd han och ich mich vnd min erben fur si vnd ir erben vnd o^vch mit inen gebunden, dien vorgenandon dem probst^f) vnd dem munster ze Ittingen vnuerscheidenlichen rehte wer ze sinne vnd o^vch ir nachomen an gerihte geischlichem vnd weltlichem, swa vnd swenne ez in not geschiet, vnd o^vch vzzerunt gerihtez vmbe allez, daz har an gescriben stat, mit rehter werschapht an alle geuerde. Vnd daz aber diz war, stete vnd veste belibe, so han ich ze einem rehten vrkunde dierre selbon dinge, so har an gescriben stat, vnd durch ein gancze gewarzami min ingesigel gehenchet an dizen selben brief. Dierre brief wart geben vnd geschach diz ze Dyezenhouen⁵, an dem naehsten cistage vor sant Johans tult dez To^vphers innan sunwenden, do man calte von gottez geburt druczehenhundert iar vnd dar nach in^g) dem sehzten, do man czalte die iar cal der cinsture ze Rome in dem vierden jare.

Source Fulltext: Chartularium Sangallense V, Nr. 2654, S. 115.