Allen, die disen brief ansehent ald hörent lesen, künd ich her Gotfrid der Mülner von Zürich, kilchhere ze Küßenach¹ bi Zürich Sewe², das Marti der Zimberman von Küßenach durch siner sele heiles willen geben het dem kloster ze Wurmsbach³ mit miner hant, gunst und willen eine kamere reben, du von der vorgenanden miner kilchen ze Küßenach erbe ist vnd gelegen ist ze Küßenach hinder der kilchen an dem velde entzwischent minen reben vnd des gotzhuses von Kapelle⁴ reben vnd der kilchen jerglich ze st. Gallen tult giltet drithalb immi ehernen gewonliches meßes an sant Niclauses altar. Also han ich dem vorgenanden Martin das vorgenande gut ze rechtem libdinge verlihen vmb den vorgenanden jerglichen zinß. Vnd zeinem offenen steten vnd geweren vrkunde der vorgeschribenen dingen so besigell ich disen brief mit minem offenen ingesigele. Dis beschach Zürich vnd wart dierre brief geben, do man zalte von gottes geburt drüzehenhundert jar, darnach in dem nunden jare an dem nehsten mentage vor der vfvart.

Source Fulltext: Chartularium Sangallense V, Nr. 2720, S. 164.