Gebhardus prepositus Argentinensis et thesaurarius Const(antiensis)¹ venerabilis in Christo patris ac domini Gerh. dei gratia Const(antiensis) episcopi² vicarius in temporalibus et spiritualibus generalis universis Christi fidelibus presentium inspectoribus affectum caritatis cum notitia subscriptorum. Bone II rei dare consultum et presentis habet vite meritum et eterne retributionis premium cernitur expectare. Hinc est, quod illustris vir Růd. comes de Habspurg avunculus noster ac Johannes filius suus³ cupientes divinum cultum tam || in ecclesia parrochiali oppidi Raprehtswille⁴ quam in ecclesia Jonen⁵ sita prope dictum oppidum Raprehtswille, quarum ecclesiarum iuspatronatus dictis comitibus pertinere dinoscitur, ampliare, nobis humiliter suplicarunt, cum in dicta ecclesia Jonen propter tenuitatem || reddituum ipsius sacerdos ydoneus non valeat comode sustentari, quatenus eandem ecclesiam altari constructo in dicta parrochiali ecclesia Raprehtswillein honore gloriose dei genitricis consecrato unire et incorporare prebendamque ex redditibus dicte ecclesie in Jonen et ex oblationibus, remediis et obventionibus ratione dicti altaris prebendario, qui pro tempore fuerit, provenientibus constituere sub oneribus subnotatis, que tam prebendarium quam dictos comites eorumque heredes et successores debent contingere, dignaremur. Nos attendentes postulantium pium motum, qui hanc unionem petunt fieri ad divinum cultum augmentandum, ad honorem dei gloriosi genitricisque sue Marie virginis, ob remedium animarum parentum suorum felicisque recordationis domine Elizabeth⁶ coniungis dicti Růd. comitis avunculi nostri matris Johannis filii sui prenotati, animadvertentes quoque, quod prebendarius dicto altari instituendus residentiam personalem faciens in oppido Raprehtswille subditis ecclesie in Jonen ratione vicinitatis preesse potest comode et prodesse in officiando dictam ecclesiam et in ministrando ipsis ecclesiastica sacramenta, in qua quidem ecclesia hactenus, prout ad nos pervenit, raro fuerunt divina officia celebrata, rememorantes quoque, quod huiusmodi unio ecclesie parrochiali oppidi Raprehtswille dampnosa non erit sed multipliciter fructuosa, petitioni eorundem comitum condesendere^a) cupientes, assensu expresso viri discreti Hermanni rectoris dicte ecclesie in Raprehtswille attendente dictam ecclesiam in Jonen auctoritate ordinaria unimus et incorporamus ex causis predictis altari memorato et prebendam in dicto altari perpetuam constituimus et ordinamus ex redditibus dicte ecclesie in Jonen ac remediis, oblationibus et obventionibus sub modo subnotato, videlicet quod post obitum vel cessionem^b) honorabilis viri Cv^onr. Wissen prepositi ecclesie Zurziacensis⁷ rectoris dicte ecclesie in Jonen dicti comites vel eorum heredes aut successores ipsis non extantibus sacerdotem ydoneum alias non beneficiatum debeant, et quosciens^a) vacaverit, presentare loci ordinario ad prebendam dicti altaris, et Ordinarius huiusmodi sacerdotem de prebenda dicti altaris, cui annexa, unita et incorporata est cura animarum ecclesie in Jonen, debet investire, salvis ordinario et archidyacono loci, quicumque pro tempore fuerit, per omnia iuribus de ipsa ecclesia in Jonen hactenus et in futurum tam debitis quam consuetis. Idem etiam sacerdos investitus se debet obligare corporali per eum prestito sacramento, quod residentiam in prebenda dicti altaris faciat personalem et quod in dicta ecclesia Jonen, in qua usque ad hec tempora spatio duarum ebdomodarum una tantum missa solita extitit celebrari, extunc singulis diebus dominicis festivitatibus nativitatis domini, pasce, pentecostes, quatuor festivitatibus virginis gloriose Marie, omnium apostolorum, festivitate omnium sanctorum, commemoratione fidelium animarum celebrare teneatur subditisque eiusdem ecclesie sacramenta ecclesiastica ministrare ipsisque tamquam sacerdos proprius preesse et prodesse, ceteris autem diebus festivis et privatis missam in altari predicto debet celebrare tempore surgentis aurore et collectam dicere specialem, qua dictorum comitum ac etiam quondam domine Elizabeth suprascripte memoria habeatur, summopere etiam dictus sacerdos canere debet, ne misse popularis celebratio, que cottidie fit ad altare predictum, ex tardatione sua videatur aliqualiter impediri. Auctoritate etiam ordinaria per dictos comites et rectorem extat ordinatum, quod sacerdos, qui pro tempore ad dicti altaris prebendam fuerit institutus, in horarum^c) canonicarum missarumque celebratione audiendis confessionibus, penitentiis iniungendis, sacramentis ecclesiasticis ministrandis parrochianis dicte ecclesie in Raprehtswille rectorem eiusdem ecclesie seu . . vicarium suum populum regentem ibidem coadiuvare debet, cum fuerit requisitus. Ipso autem rectore vel vicario invito idem prebendarius se non debet ingerere de premissis vel aliquo premissorum. Et quia consentaneum esse rationi dinoscitur, ut, qui ad onus eligitur, repelli non debeat a mercede, de consensu et libera voluntate rectoris ecclesie in Raprehtswille extat ordinatum, ut prebendarius altaris prenotati medietatem oblacionum, que sibi ad idem altare offeruntur, item medietatem ammonitionum, remediorum aliarumque obventionum, quocumque nomine censeantur, sibi pietatis intuitu et ocasione prebende sue a subditis dicte ecclesie in Raprehtswille sive a supervenientibus quibuscumque datarum, legatarum seu donatarum qualitercumque, comodocumque^a) vel a quibuscumque in infirmitate vel sanitate constitutis sibi retineat et in usus suos convertat et aliam medietatem sub virtute per eum prestiti sacramenti dicto rectori aut eius vicario, qui in ecclesia resideat, absque dolo et fraude et captione qualibet exsolvat fideliter et assignet. Quidquid etiam eidem prebendario ad augendum dicti altaris redditus datum fuerit a Christi fidelibus vel legatum, id sine diminucione qualibet ad comparationem rerum inmobilium in usum et utilitatem dicti altaris de scitu rectoris ecclesie predicte vel vicarii sui ibidem residentis per eum debet converti sub virtute per eum prestiti sacramenti, quousque dictum altare cum redditibus ecclesie in Jonen habeat redditus octo marcharum argenti communi estimatione, que vulgo dicitur herron gulte. Deinde legata huiusmodi equa lance dividi debent inter ipsum prebendarium et rectorem ecclesie prenotate sub virtute per dictum prebendarium prestiti sacramenti. Et ut premissa ordinatio a dictis comitibus eorumque successoribus^d) diligentius observetur, hoc onus sibi et suis imponunt successoribus et heredibus, quod post cessionem vel decessionem nunc rectoris ecclesie in Jonen et quoscienscumque^a) extunc dicta ecclesia in Jonen vacaverit, quod infra duos menses a die vacacionis et notitie computandos sacerdotem alias non beneficiatum debeant presentare loci ordinario ad prebendam predicti altaris, cui unita et annexa est cura animarum ecclesie in Jonen, et si in presentacione huiusmodi patroni forent negligentes vel remissi, iidem patroni dant et concedunt hiis in scriptis potestatem et ius rectori ecclesie in Raprehtswille, qui pro tempore fuerit, sacerdotem huiusmodi ad prebendam dicti altaris infra alios duos menses proxime subsequentes loci ordinario presentandi. Et si rector huiusmodi per dictos duos menses negligens vel remissus fuerit in hac parte, extunc loci Ordinarius plenam habere debet potestatem providendi dicto altari de sacerdote alias non beneficiato iuxta formam et onera suprascriptas, sane si prebendarium dicti altaris, qui pro tempore fuerit, contingerit aliud beneficium adipisci, corporali possessione ipsius beneficii adepta, prebenda dicti altaris vacare debet patronique eius sacerdotem ydoneum alias non beneficiatum ad dictam prebendam debent sub forma suprascripta loci ordinario presentare. Et ut omnia et singula suprascripta inviolabiliter perpetuo observentur, ad petitionem dictorum comitum premissis omnibus et singulis auctoritatem ordinariam impertimur ac ea etiam approbamus et presentibus confirmamus. In evidentiam omnium premissorum episcopale sigillum quo utimur hiis triplicatis litteris appendentes. Datum Const(antie) anno domini M°.CCC°X°. X. kaln. aprilis, indictione VIII.||
Nos Růd. comes de Habspurg prenotatus presentibus confittemur^a) omnia et singula suprascripta de nobis vera esse et ita acta fore, prout suprascripta sunt, et ea promittimus nos observaturos inviolabiliter, ad hec nostros heredes et successores presentibus obligantes, promittimus etiam bona fide, quod procurabimus et efficiemus, cum Johannes comes filius noster predictus ad etatem venerit legittimam, quod pro se et suis heredibus ratificabit omnia et singula suprascripta. Et in premissorum evidenciam sigillum nostrum hiis litteris triplicatis duximus appendendum sub anno, die, loco et indictione prenotatis. Suplicamus quoque venerabili domino Johanni dei gratia abbati monasterii Heremitarum⁸ necnon . . consulibus predicti oppidi in Raprehtswille, ut hiis litteris triplicatis sigilla sua apponant et appendant. Ego Johannes natus predicti Růd. comitis de Habspurg presentibus confitteor^a) omnia et singula suprascripta de me vera esse et ita acta fore, prout suprascripta sunt, et promitto fide data nomine iuramenti, cum ad etatem legittimam pervenero, quod expresse consentiam prenotatis meque et heredes meos obligam ad oberservationem premissorum. Et quia sigillum proprium non habeo, me sub sigillo dicti patris mei obligo ad premissa fideliter adimplenda sub anno, die, loco et indictione prenotatis. Suplico quoque venerabili domino Johanni dei gratia abbati monasterii Heremitarum ac . . consulibus oppidi in Raprehtswille, ut sigilla sua appendant hiis litteris triplicatis.||
Nos Johannes dei gratia abbas monasterii Heremitarum sigillum nostrum ac nos .. consules oppidi in Raprehtswille sigillum civium nostrorum ad peticionem preis dictorum illustrium comitis Růd. de Habspurg ac Johannis filii sui hiis litteris triplicatis duximus appendenda.

Source Fulltext: Chartularium Sangallense V, Nr. 2744, S. 178-181.