Allen den, die disen gegenwurtigen brief ansehent ald ho^erent lesen, kunden wir her Willehalm von Staina¹ ritter vnd min êlichiv wirtinne vro Adelhait, das wir haben || gegeben ze ko^vfen reht vnd redelichen Hainrich dem Blarer vnd Hainrich dem Spiser burgern von Kostenze vnser gůt ze Owenhouen², das da lit bi Mose³, mit holze, || mit velde, mit wisan, mit stocke, mit zwige, gesuchtes vnd vngesůchtes, vnd die hůbe, der man da sprichet der Scha^echeier hůbe, div da lit bi Erthusen⁴, mit aller ehafilti, mit allem rehte, wort vnd werche, nah des landes gewonhait, alse ich div vorgenant vro Adelhait div vorgesprochen gu^eter gehebt han ze rehtem erbe von miner můter saligun ie die marche geltes vmb zwo vnd zwainzich marche lo^etiges Silbers Kostenzer glo^etes, vnd wurden o^vch des gůtes von Hainrich dem Blarer vnd von Hainrich dem Spiser gar vnd ga^enzlichen gewert, vnd ich div vorgesprochen vro Adelhait von Staina gap div vorgesprochen gůter vf vriliche vnd vmbtwungelich^a) mit mines wirtes hern Willehalms von Staina ritter vnd mit miner sune Willehalmes vnd Bertoldes⁵ willen vnd gunst, vnd gabent mir Hainrich im Kilchhoue von Arbo^vn⁶ dar vber ze vogte, vnd gap ich div vorgenant vro Adelhait vnd min vogt div vorgesprochen gůter vrilichen vf mit vnser hant in probst^b) hant von Strazburch⁷, der pfleger ist des gotzhuses ze Kostenze an vnsers herren stat bischof Gerhartes⁸, der lehen herre ist der vorgenanter gůter, mit allen den Worten vnd werchen vnd geta^eten, so ze so getaner lehenschaft vnd vf ze geben geho^eren mag alder sol nah des landes gewonhait, vnd baten vnsern herren den vorgenanten pfleger des gotzhuses ze Kostenze, das er div vorgesprochen gůter Hainrich dem Blarer vnd Hainrich dem Spiser lihe ze rehtem lehen, vnd tet o^vch das von vnser bette mines vnd mins vogtes mit allem dem rehte, alse ich siv hette. Ich her Willehalm von Staina ritter vnd mine sune Willehalm vnd Bertolt veriehen offenlich an disem brieve, das dis alles, so an disem brief geschriben stât, beschehen ist mit vnserm gůtem willen vnd gunst, vnd verzigen vns vnd verzihen an den vorgenanten gůtern alles des rehtes vnd alles des erbes, so wir an den vorgenanten gůtern hetton alder iemer mo^ehtin gehan oder gewunnen mit dehainen dingen, won siv vnser můter reht erbe warent, vnd gaben Hainrich dem Blarer vnd Hainrich dem Spiser die gewer vnd den nutze der vorgesprochenen gůter vrilichen vf mit allem rehte vnd mit aller ehafti. Dis geschach ze Kostenze in des kusters sa^eligen⁹ houe, an dem na^ehsten||
cinstage nah der liehtmis, in dem jare, do man zalte von gottes geburte tri^vzehen hundert jâre vnd in dem zehenden jâre, da ze gegen wâren her Arnolt von Burgelon¹⁰, her Hainrich der maier von Lo^vchenowe¹¹ rittere, Cůnrat der Munser, Rv^odolf A^engelli, Walther von Honberch¹², Johans der Goltsmit¹³, Cůnrat vnd Lutfride die Ba^etminger, Cůnrat de Not^c), der junge Go^ezzeli, V^olrich der Lindower von Stadelhouen¹⁴. Das dis wâre si vnd sta^ete belibe, so an disem brief geschriben stât, da von geben wir her Willehalm von Staina ritter vnd Willehalm vnd Bertolt gebrůder von Staina vnseri insigel an disen gegenwurtigen brief ze ainem waren vnd sta^etem vrkunde.

Source Fulltext: Chartularium Sangallense V, Nr. 2738, S. 174-175.