Allen den, die disen gegenwurtigen brieff jemer an sechend oder ho^errend lesen, kundent wir her V^olrich vnd her Burkart von Ramswag gebrůder¹, das wir den hoff ze Wisan², der vnser beder gemeines vnd recht lehen was von dem gotzhus ze sant Gallen, mit wasen vnd mit zwyg, holtz vnd veld, aker vnd wisen vnd mit allem dem, so dar in geho^ert, es sig gesůcht alder vngesůcht ald wie es genemmet sig, bede sament haben verkouffet vmb syben vnd o^vch drissig march silbers Costentzer geweges vnd ouch gefertgot recht vnd redlich mit vnsers herren hand abbt Heinriches³ des vorgenempten gotzhus einem erbern man Eglolff dem Bla^vrer burger von sant Gallen. Wir haben vns ouch bede samen dem selben Eglolff gebunden vnuerscheidenlich, des vorgeschobnen hoffes jemer wer ze sin nach recht für recht lehen vnd fur ledig vnd ler vnd fur vnansprechig, vnd darumb so haben wir im ze burgen gesetzet V^olrich von Sultzberg⁴ kilchenherren ze Tal⁵ vnd Cůnraten Arnolt burger ze sant Gallen. Vnd das dis war sig vnd sta^et belibe, dar vmb so geben wir dem vorgenempten Eglolff disen brieff besigelt mit vnser beider insigel ze einem sta^eten waren vrkund aller der dinge, so da vorgeschriben sind. Diser brieff ward geschoben vnd geben ze sant Gallen des jares, do man zalt von gottes geburte druzechenhundert vnd drutzechen jar, an dem dritten fritag in dem mertzen. Da waren da ze gegen die erbern gezugen, die hienach geschriben sind, V^olrich von Meldeg⁶, Cůnrat vnd Růdolff von A^enwil^a)7 gebrůder, Berchtolt von Anwil⁸, Cůnrat von Epenberg⁹, Cůnrat der Kuchimeister¹⁰, Johans der Fuller, V^olrich der Kerhe, V^olrich der Sattler vnd ander erber lut vil.

Source Fulltext: Chartularium Sangallense V, Nr. 2852, S. 240.