Allen dien, die disen gegenwurtigen brief iemer an gesehent alder ho^erent lesen, kunden wir her V^olrich von A^emz ritter vnd Marchwart sin brůder¹, daz wir bede || vnuerschaidenlich vnseren erwirdigen herren abt Hainrich² von gottes genaden vnd dem conuent des gotteshuses ze sant Gallen in des selbes gotteshuses namen || ze koffen haben gegeben reht vnd redlich vnd och vf gegeben das gůt ze Stanital³ vnd das gůt an der Egge⁴, du wir von dem vor genemten gotteshuse II hetten ze rehtem lehen, vnd alle die lute, die ze den selben gu^eter ho^erent, swa su gesessen sigen, su weren vnser aigen ald vnser lehen von dem vor genemten gotteshuse, an die lute, die hinder vns vor dem tag, do dierre ko^vf beschach, geuarn waren vber Rin alder in das Rintal, vnd ân Arnolten vnd Růdolfen vs Stainital, die vns ansprechig waren von vnserm herren grauen Kraften von Toggenburg⁵, vmbe funf vnd funfzeg march silbers Costenzer geweges vnd vmbe aht phunde geltes Constenzer munse, da mit vns die vor genemten vnser herren vergolten vnd widerlait hain die vor geschriben gu^eter vnd och lute, vnd des selben silbers sigen wir von inen gewert vnd sigen och der gult vnderwist, als hie nah geschriben stat, su han vns gegeben vnd verluhen ze rehtem lehen vns baiden vnd vnseren erben, es sigen man alder vrowan, zwai phunt geltes vs dem hove ze Tuffenbach⁶ vnd vierdhalb phunt geltes vs dem houe ze Marpach⁷ vnd drithalb phunt geltes vs dem gůt in dem Mose⁸. Wir han vns och gebunden baiden vnuerschaidenlich für vns selbe vnt^a) für vnser erben, dien vor genemten vnseren herren vnd iro nach komenon an des vor geschriben gotteshuse stat wer ze sinne der vor gesprochenun gu^eter vnd och lute nah reht. Wir wellen och, das alles das, daz da vor geschriben ist, alle die kraft hab, als ob es vor ainem rihter geschehen sige. Vnd das dis war sige vnd stet belibe, dar vmbe so geben wir den vor genemten vnsron herron vnd dem gotteshuse disen brief besigelt mit vnser baider insigel ze ainem steten waren vrchunde aller der dinge, so an disem brief geschriben stant. Dis beschach vnd wart an disem brief verschriben ze sant Gallen, in dem jar, do man zalt von gottes geburte druzehenhundert vnd druzehen jar, an vnser vrowen tag ze der liehtmisse, do ze gegen waren die erberen gezuge, die hie nah geschriben stant, her Růdolf der kilcherre von Roschach⁹, her Johans von Luterberg¹⁰, Eglolf von Rosenberg¹¹, Lutolt der Schenche¹², Hainrich Walther von Sulzberg¹³, Cůnrat von Luterberg¹⁴ vnd Amôr von Luterberg¹⁵, V^olrich Meldli¹⁶, Hainrich im Kilchof¹⁷, Růdolf der schulthais von Wile¹⁸ vnd anderre biderber luton vil, die es ain warhait wissen.

Source Fulltext: Chartularium Sangallense V, Nr. 2841, S. 231-232.