Allen, die disen brieff an sehend oder ho^erent lesen, kunden wir her Wilhem^a) von Staina ritter vnd Wilhelm sin sun¹, dz wir zwein erbern mannen Heinr. dem Spiser vnd Snewissen burgern ze Costentzze kouffen haben geben recht vnd redlich das gůt, heist der Burgender gůt², lit ze Berg³ bi dem gůt, das man nempt das Bol⁴, inen dz selb gůt ze haben vnd ze besitzen ze rechtem eigen mit allem recht, won das si da von jerlich richten vnd geben sond den zehenden vnd acht Schilling pf. Cost(entzer) muntz zins den frowen ze Munsterlingen⁵, vmb zwo vnd zweintzig march silber Cost(entzer) gewegs, die wir von inen enpfangen haben. Wir haben vns ouch gebunden fur vns vnd vnser erben den vorg(enanten) Heinr. vnd Schnewiß vnd ir erben, des vorg(enanten) gůtz wer ze sin nach recht. Darumb so haben wir in ze burgen geben zwen erber man V^olr. Hinder sant Johans den jungern vnd Hugen Schnewissen burger ze Costentz. Diser kouff beschach mit allen den Worten vnd werchen, der man bedarff ze gantzer rechter fertgung von gewonheit in so^elichen Sachen. Vnd dz^b) war sig vnd sta^et belibe, darumb so geben wir dem vorg(enanten) Heinr. vnd Schnewissen disen brieff besigelt mit vnser beider insigel ze einem sta^eten vrkunde aller der ding, so an disem brieff geschriben stand. Dis beschach ze Costentz in dem jar, do man zalt von gotz geburt druzehenhundert vnd vierzehen jar. Presentes Bartlome der stat amman ze Costentz⁶, Johans von Tettikouen⁷, Růd. der Hartzer, V^olr. Vnderschopff vnd ander erber lut.

Source Fulltext: Chartularium Sangallense V, Nr. 2909, S. 267.