Omnibus presentes litteras inspecturis vicarii reverendi in Christo patris ac domini Gerh. dei gratia Constantiensis episcopi¹ in spiritualibus et temporalibus generales subscriptorum notitiam cum salute. Inter opera charitatis tanquam sydus lucidum eluscessit, cum redditibus et competentibus altaria dotantur divino cultui deputata, ut sacerdotes eorundem relicta mendicitatis indigentia possint divino cultui iugiter intendere et vacare. Cum itaque altare constructum sub testudine sacristiae ecclesiae Constantiensis dedicatum sit in honore gloriosi confessoris sancti Conradi quondam praesulis ecclesiae Constantiensis² et ad dotem eiusdem perpetuam de rebus mobilibus relictis per piae memoriae quondam H. de Khlingenberg episcopum Constantiensem³, prout idem mandavit fieri in sua ultima voluntate, decima in Enghusern⁴ feodalis ab ecclesia Constantiensi seu episcopis eidem praesidentibus sit rite ac rationabiliter comparata nobisque tanquam vicariis generalibus in spiritualibus et temporalibus venerabilis patris G. dei gratia Constantiensis episcopi supradicti sit ex parte .. capellani dicti altaris instanter et humiliter supplicatum, quod decimam eandem in usus perpetuos dicti altaris et sacerdotis seu capellani eiusdem, quicunque pro tempore fuerit, de consensu honorabilis capituli ecclesiae Constantiensis transferamus. Nos considerantes augmentum divini cultus ad sollicitudinem pastoralis officii et potestatis ordinarie precipue pertinere, de consensu voluntario et expresso honorabilis capituli ecclesiae Constantiensis predictae decimam prefatam cum omnibus suis iuribus et pertinentiis realiter et in perpetuum usibus altaris sancti Cunradi memorati et capellani eiusdem, qui nunc est et quicunque pro tempore in perpetuum eidem altari preficietur, scriptis presentibus in perpetuum annectimus et applicamus, retento tamen in signum applicationis huiusmodi censu annuo episcopatui Constantiensi videlicet dimidia libra cerae solvenda in perpetuum de ipsa decima in festo nativitatis domini annis singulis camerae domini nostri .. episcopi Constantiensis, qui nunc est vel quicunque pro tempore fuerit, a capellano aut sacerdote eiusdem altaris, quicunque tunc ibidem fuerit, sine quolibet impedimento, adhibitis||
per nos in omnibus et singulis supradictis verborum ac gestuum solennitatibus debitis et consuetis. In evidentiam itaque premissorum ipsorumque inviolatabilem et perpetuam firmitatem presentibus una cum sigillo capituli ecclesiae Constantiensis predictae sigillum episcopale, quo utimur, decrevimus appendendum. Nos capitulum ecclesiae Constantiensis predictum recognoscentes ea, que premissa sunt, de nostro consensu expresso rationabiliter fore peracta, eadem omnia et singula ratificamus et etiam approbamus, appendentes ad firmitatem irrefragibilem eorundem presentibus sigillum nostrum. Datum et actum Constantie, anno domini millesimo tricentesimo quartodecimo, octava idus maii, indict. duodecima.

Source Fulltext: Chartularium Sangallense V, Nr. 2885, S. 254-255.