Universis Christi fidelibus, ad quos presentes pervenerint, Krafto comes de Toggenburg canonicus maioris ecclesie Constantiensis || necnon prepositus ecclesie Thvricensis¹ subscriptorum noticiam cum salute. Acta hominum ne perversorum maliciis calumpniari valelant, cautum est ea ad perpetuam firmitatem scripturarum testimonio perhennari. Noverint igitur, quos nosce fuerit oportunum, || quod Heinricus et Krafto fratres dicti Snôde² fideles nostri decimam in Gvntersperg³ reddentem singulis annis sex maltaria annone a nobis in feodum tenuerunt, que ad nos titulo proprietatis pertinere dinoscebatur, ad manus nostras rationabiliter sponte et libere resignarunt. Nos vero pietatis zelo moti pro anime nostre nostrorumque^a) remedio eandem decimam cum omnibus suis pertinentiis et iuribus universis reverendis in Christo dominis et viris religiosis .. abbati et conventui in Rvti⁴ ipsorumque monasterio pure et simpliciter ob honorem gloriose virginis titulo proprietatis contulimus et donavimus et presentibus conferimus et donamus perpetuo libere possidendam. In horum itaque evidenciam et maioris certitudinis firmitatem, ne predicti religiosi aliquatenus in posterum ausu nefando in hac donatione possint molestari seu calumpniari, sed ut predicta rata et illibata permaneant, hoc presens instrumentum ipsis sigilli nostri munimine tradidimus et tradimus communitum. Dat. in Lvtenspurg⁵, anno domini M°.CCC°.XVII°. pridie kal. septembr. indictione XV^a. presentibus hiis testibus videlicet domino Johanne capellano et vicario in Ganterswile⁶, Hermanno ab dem Hvse, .. dicto Senfli et aliis pluribus fidedignis.

Source Fulltext: Chartularium Sangallense V, Nr. 3005, S. 324.