Wir Růdolff propbst der kilchen zu Chur¹ vnd V^olrich² gebru^eder gra^vuen zů Montfort embiettend allen denen, so dise brieff ansehend, hail vnd erkantnu^es der nachgeschriben ding. Das nit die milten oder gu^ettigen werch vnd datten der mentschen durch die lengi des hingenden zits irer krefft vnd stercki schaden mussind liden, ist fu^ersechen, das die selbigen mit hilff der geschrifft in ewiger gedachtnus mugind bliben, darumm so wellend wir, das zů erkantnus der gegenwu^ertigen vnd hernach ku^enftigen kummy, das dem nach als der hoff des erwirgen^a) in got vatters des abts vnd conuents des gotzhuses sant Johannsen im Turtal³ Costentzer bystumbs, welher gelegen ist in Churer bystumb an dem ort, das gwonlichen genant wirt Kalkaren⁴, vnd die lu^et da selbest mit andren lu^eten in vnnser grauffschafft, die denn sitzend vnd wonhafft sind in den do^erfren Sultz⁵ vnd Wyler⁶, kain gmainschafft weder vß gerechtikait noch gewonhait weder in gstu^eden wa^elden oder waiden gehebt hand, darumm ouch die selbigen lu^ett des obberu^erten hoffs zů Kalkaren vil grosser mengil vnd schwa^erer scha^eden gelitten hand, so^elichs angesehen so habend wir von des anligenden bitts wegen des erwirdigen in gott vatters des abts vnd conuents des egedauchten gotzhuses denen lu^eten des vorbestimbten hoffs Kalkaren, die sich dann bißher tailhafftig gemacht habend der gestu^ed wa^elden vnd wayden in den gu^ettren oder besytzungen der genanten abts vnd conuents, welhy denn gelegen sind in der cluß zwu^eschmad Kalkaren vnd Getzis⁷ indert den bergen Glober⁸ vnd Tschu^etsch⁹ vnd Montmurne¹⁰, gegeben vnd verliehen, das sy mit den vorgenanten lu^eten der do^erfer Sultz vnd Wiler in v^ennser gra^vffschafft wonend volkummilich tailhafftig sin mugend vnd gmainschafft mit inen haben mit aller vnd volkumner gerechtikait in allen jeren gestu^eden wa^elden vnd waiden. Dargegen vnd vmm das so habend die gedauchten abt vnd conuent des selbigen gotzhuß angesehen den nutz vnd geschicklihait des hoffs vnd der lu^eten zů Kalkaren, vnd mit gmainem raut vnd offnen handil zů ainer Widerlegung der gmainschafft oder tailhafftigi, so wir denen von Kalkaren gegeben, habend sy vnns widerum gegeben die gu^eter vnd besitzung des gotzhuß sant Johannsen im Turtal, die denn in der cluß gelegen sind vnd mit den obbeschriben bergen beschlossen oder vsgeschaiden sind, die denn biß her mit gerechtikait der aygenschafft gemeltem gotzhuß zůgeho^ert habend, vnd gebend v^enns ouch die selbigen mit der aller volkumnosten gerechtikait der aigenschafft on alles widersprechen yerer allen vnd yedes besunder vnd aller irer nachkomen, vnd aber vmm des willen, das zwu^eschmad den vorgenanten abt vnd conuent des vil gedauchten gotzhuses an ainem vnd v^enns vnd dem pfarrer der kilchen Getzis am andren tail ally vrsach der zwitracht oder vnainikait hingenommen werd, sind wir des also gmainlich vnd ainhelliklich v^eberainkommen vnd habend das also geordnet vnd zůgegeben, das von den gu^eter oder besitzungen in der vorbestimbten cluß gelegen, die dann yetz gebuwen sind oder noch gebuwen wurdind, darzů von den nu^ewbru^echen, die yetzund gemacht sind ald noch gemachet werdend, die zwentail der zechenden nachuolgen vnd gegeben sond werden der vorgesagten kilchen zů Kalkaren, vnd der drittail der zechenden sol gegeben werden der pfarrkilchen zů Getzis, vnd sol da by vsgeschlossen vnd hingelegt sin in allen vorgemelten dingen ally vntru^ew vnd arglist. Vnd zů warem vrku^end aller obbeschriben dingen habend wir obgenanten gra^vuen vnnser sigil an disen brieff gehenckt. Geben vnd geschechen in v^ennsrem schloß Montfort¹¹ in dem jar, als man zalt nach der geburt Christi tusent dru^ehundert vnd achtzehen jar, vff frytag na^echst vor sant Gallen tag.

Source Fulltext: Chartularium Sangallense V, Nr. 3031, S. 340-341.