Allen, die disen brief sehent oder horent lesen, kunden wir her V^olrich Sto^eri kilchenhêrre ze Walde¹, V^olr. sin brůder, Elizabeht || ir swester, Bertolt Heinrichs seligen Sto^erins sun von Gru^eningen² vnd^a) fro Hetzza sin swester vmb die ansprache vnd fordrun||ge, die wir hatten an hern Herman pfrůnder ze Walde vnsern gůten frunt vmbe den hof ze Rikkenbach³ vnd vmb || andru ligenten gu^eter, du an die pfrůnde ze Walde ho^erent, vnd mit namen vmb alle rechtunge, du vns von rechter êrbschaft von ligendem gůt vnd von varndem von hern V^olrich seligen Sto^erin wîlent kilchenhêrren ze Walde⁴ vnd der fro^vwen seligen von Singgenberg⁵ sinr swester waz an gevallen, daz wir vur den schultheitzen vnd den rat der stat ze Rappreswil⁶ an offen gerichte^b), vnd nach der vorgenanden fordrunge do sazten wirs vnserhalp vmb die vorgenanden ansprache mit gůtem willen an Johansen Gamlenstein vnd an Jacob von Kaltprunnen⁷, vnd der vorgenande her Hêrman sazte ez sinhalp vffen Heinr. den Amman⁸ vnd Wernher von Ranbach, vnd waz die vier man vns dar vmb hiessen vnd vber ein kernen vnd o^vch schieden, daz lo^vbten wir mit vnsren truwen stete ze haben an allen vâr, also weder teil den scheit vnd daz sprechen breche vnd nicht stete hetti, dem wer sin recht enpfallen an allen furzug, also sprechen wir vnd veriechen offenlich an disem briefe, daz wir nach der vorgenanden schideluten scheiden vnd sprechen mit dem vorgenanden hern Herman lieplich vnd gu^etlich sin berichte^c) mit gantzer richtunge vnd wir noch vnser erben mit im vmb die vorgenanden ansprach vnd erbschaft dur recht nicht mê haben ze schaffen vnd daz wir noch vnser êrben den vorgenanden hern Herman vmb den hof ze Rikkenbach noch vmb andru gu^eter der pfrůnde ze Walde noch vmb alle rechtunge der vorgenanden erbschaft weder an geistlichem noch an weltlichem gerichte niemer besweren noch beno^eten noch mit keinen^d) dingen vf triben, da mit er von vns schaden oder kumber vmb die vorgenanden ansprache dulden mo^echti keinen weg, vnd ze einr Sicherheit der vorgenanden richtunge so haben wir vur vns vnd vnser erben entzigen an Johans hant Ro^eteileins schultheitzen ze Rappreswil⁹ vnd entzîhen vns an disem brief der vorgenanden ansprache vnd rechtunge, als recht ist, wan wir die vorgenanden fro^vwen dis als haben getan mit willen vnd gunst V^olrichs Sto^eris vnd .. dez Peigen¹⁰ von Baden¹¹ vnser rechten vo^egten. Vnd ze einem offen vnd gewarem vrkunde der vorgescriben dingen so haben wir gebetten .. den schultheitzen vnd den rat der stat ze Rappreswil, daz si ir burger ingesigel geben an disen brief, wan wir eigern^c) ingesigel ze disen ziten nicht hatten. Wir Johans Ro^etellein schultheitze, Heinr. der Amman, Johans Gamlenstein, Wernher von Ranbach, Johans Gamlensteins sun, Arnolt von Grůnowa¹², V^olr. von Russikon¹³, Cůnr. im Kêr, Heinr. Walpersperg¹⁴ vnd Herman Haehel der rât der stât ze Rappreswil wissen ein offen warheit der vorgescriben dingen, vnd dar vmb geben wir dur bette der vorgenanden luten vnser burger ingesigel an disen brief. Der wart geben ze Rappreswil, do man zalt von gottes geburt druzehen hundert jar, dar nach in dem nuntzehenden jare, an dem zinstage vor sant Johans dult dez to^vffers.

Source Fulltext: Chartularium Sangallense V, Nr. 3054, S. 355-356.