Wir grave Kraft von Toggenburg chorherre ze Costenze vnd brobest ze Zvrich² vnd och wir grave || Friderich von Toggenburg och chorherre ze Costenze³ vnd grave Dietheln von Toggenburg⁴ sin brůder kunden || vnd veriehen offenlich allen den, die disen brief lesent oder ho^erent lesen, daz wir alle gemainlich Johansen von || Langehart⁵ die genad haben getan, ist daz er veruert âne sune, daz wir sinen tohteran Gůtun, Kaeterin vnd Adelhait, vnd ob im got me tohteran git mit fro Elsbêtun siner elichun wirtenne, die reht haben gegeben ze erbenne in allem dem reht, als ob sv sune waeren, den zehenden ze Aeschlicon⁶ vnd die hv^obe ze Dietzenswile⁷, die man haizset des Bu^elers hv^ob, die er von vns ze rehtem lehen hat. Vnd daz dis war si vnd staet belibe, dar vmbe so han wir vorgenanten herren grave Kraft, grave Friderich vnd grave Dietheln von Toggenburg vnserv âigenn ingesigel an disen gegenwurtigen brief gehenket ze offenen vrkunde der vorgeschribenen dinge. Daz beschach ze Jonswile⁸, da ze gegen waren Hiltbolt der kilcherre ze Bichelnse⁹, Johans von Landesberg¹⁰, Walther von Landesberg¹¹, Johans vom Tôsse¹², Walther von Langenhart¹³, Růdolfus der schriber von Hinderburg¹⁴ vnd ander erbaer lute vil, die ez sahen vnde horten. Dirre brief wart geschriben, do man zalt von gottez geburte druzehenhundert jar, dar nach in dem nunzehenden jar, an der naechsten mitwochun nach sant Walpurg tag.

Source Fulltext: Chartularium Sangallense V, Nr. 3048, S. 352-353.