Allen den, die disen gegenwvrtigen brief sehent, lesent oder ho^erent lesen, kvnden wir Hiltebolt von gotes genaden apt des || gotzhvs ze sant Gallen¹, das fvr vns kam der ersam man Go^eswin von Rebstain² vnsers gotzhvs dienstman, vnd mit vnserm || willen, gvnst vnd hant hat versezzet redlich vnd reht V^olrich dem Arzat bvrger ze sant Gallen siner tohter wirt vnd frv^o Perpe||tuen siner tohter ze ainem werenden phant div gv^ot, div hie nah geschriben stant, vmbe zwainzik mark lo^etiges silbers Costenzer gewaegs, vnd sint das div gůt, der hof ze Rebstain, den da bvwet Johans von Mvrach³, vnd der wingart, der da lît bî der thannen, den och bvwet Johans von Mvrach, vnd dv hindern zwia bette an dem wingarten, den der Vetter bvwet, der da haiset Cv^onrat der Vetter, vnd sol der vor geschriben V^olrich der Arzait vnd frv^o Perpetua sin elich wirtin vnd sin erben dv vor benemten gv^ot aellv niesen in stiller rv^owe, das in Go^eswin von Rebstain da vor geschriben noch kain sin erbe noh nahkomen an den phanden iht irre. Ist aber, das Go^eswin von Rebstain oder sin erben wellent div vor benemten phant lo^esen, so sol er oder sin erben alle zit vor sant Johannes dvlt des toffers lo^esen, tv^ot er oder sin erben des niht, so^b) sol V^olrich der Arzait vnd sin wirtin frv^o Perpetua oder sin erben den nuzz aber des iares nemen an wider red. Ist och, das Go^eswin von Rebstain oder sin erben dv vor gesprochhen gv^ot wellen lo^esen, so sol er oder sin erben vnder zehen marken niht geben an der losvnge, git aber Go^eswin von Rebstain der vor genemte oder sin erben zehen mark silbers, so sol V^olrich der Arzait oder sin wirtin vnd sin erben div gv^ot haelbiv ledik lassen, vnd ist dv vershazzvnge geschehen mit aller der vsrichtvnge, red vnd werk, so von reht geschribem oder vngeschribem, gaistlichhem oder weltlichhem, oder von gewonhait notdvrftig was. Vnd das das alles war sige vnd staet belibe, so geben wir Hiltebolt von gotes genaden apt des vor geschriben gotzhvs ze sant Gallen disen brief gesigelten mit vnserm insigel, das dar an hanget. Ich Go^eswin von Rebstain der vor geschriben vergih ain warhait aller der dinge vnd da vor geschriben ist, vnd dar vmbe ze ainer merer vnd staeter sichherhait aller der dinge vnd da vor geschriben ist, so gip ich och disen brief besigelten mit minem insigel, das och dar an hanget. Dirre brief wart geben ze sant Gallen, do man zalt von gotes gebvrte drivzehen hvndert iar vnd in dem nivnzehenden iar, an dem fritag nah Gordiani et Epimachhi, da die ersamen lvte ze gegen waren, her Hainrich von Alsteten⁴ ritter, Cv^onrat der Kvchhimaister⁵, Johans der Mvnser, Hvg Vo^elin, Cv^onrat Arnoltz, Sthephan Vo^elin, Cv^onrat Vo^elin, magister Mathyas der Arzait, Rv^odolf der Arzait vnd ander biderber lvte genv^oge.

Source Fulltext: Chartularium Sangallense V, Nr. 3050, S. 353-354.