Wir Diethelm von gottes gnaden abt in der Richun Owe¹ kunden allen den, die disen brief || sehent lesent oder ho^erent lesen, das her Arnolt von Wildenrain² ritter fur vns kam vnd || vnbetwungenlich vns an vnser hant vf gap Ma^ehthilt Bertoltes des Vresels tohter von || Ma^erwile³, vnd bat si lihen Cůnraten in der Bunde aim burger ze Costenz, vnd do wir si vf genamen vnd dem vorgenanten Cůnraten in der Bunde verluhen, als reht was, do gaben wir mit gûnst vnd willen vnsers capittels durch bette des vorgenanten Cůnrates in der Bunde den erwirdigen herron .. dem apt vnd dem conuent des gotzhuses sant Johans in dem Tûrtal⁴ die vorgenanten Ma^ehthilt ze rehtem wider wehsel vmb Gerdrût Hainriches tohter an der Warte⁵, vnd do wir den wider wehsel vollefůrten, do luhen wir dem vorgenanten Cůnraten in der Bunde die vorgenanten Gerdrut in allem dem rehte, als wir im die vorgenanten Ma^ehthilt haton vor verluhen. Vnd zainem vrkunde ainer warhait alles des, so hie vorgeschriben stat, henken wir die vorgenanten Diethelm von gottes gnaden apt in der Richun Owe, .. das capittel des selben gotzhuses, her Arnolt von Wildenrain ritter vnd Cůnrat in der Bunde burger ze Costenz vnserv insigel an disen brief. Der wart gegeben, do man zalte von gottes geburte druzehen hundert jare vnd in dem zwainzgosten jare, dar nach an dem samstag vor sant Vitz tag in dem brachode.

Source Fulltext: Chartularium Sangallense V, Nr. 3099, S. 394..