Wir von gottes gnadon abt Hiltebolt des gottes huses ze sant Gallen¹ kundent allen den, die disen brief sehund || alder horrunt lesun, daz fur vns kam her V^olrich von Trupurg werchdegan vnd kamerer² vnsers gotteshusus^a), || mit vnserm willen vnd gunste versazte den ersamen luten hern Růdolf von Roschach kilherrun vnd hern Růdolf || von Roschach³ ritter gebrůderen die zinse, die ime ze disem gegunwrtigen jare^b) vallent ab sinan gu^etern, du hie nach geschriben stant, vsser den^a) hof ze Jonswile⁴ ahtzig schefil kernun vnd zehin malter habur vnd sehz^c) phund phenning, ze Linguwile⁵ fvnfzig mut kernun, ze V^obolsperg⁶ zwanzig schefil kernun, den zehundun ze Sumbri⁷, der da gilt nvnzehin schefil kernun, vssir dem hof ze Sumbri vier malter beder korn, vssir Wittabach⁸ drizeg schefil kernun, die vor genempten zinse hat er inon versezit vmb sehzig phund phenning Kostunzer munse, also das man die phrund for vs rihtten sol. Buscha^eh och das, das die vorgenemten von Roschach von kainum^d) gubrestun ir schadun nut zů mohtint kon, so vil so inon denne gebristid, des sont su wartent sin vf die nvzze des andern iarus. Das dis sta^et vnd war alles belib, dar vmbe so henken wir der vorgenampt von gottes gnaden abt Hiltepold vser ingesigel an dizen brief. Ich her V^olrich von Trupurg der vor geschriben vergih o^vch ainr ganzer warhait aller der ding, so da vor geschribun stant. Dar vmb so gib ich disen brief besigelt mit minum ingusigel. Dis beschach ze sant Gallen in der stad, an dem^e) na^ehsten zinstag vor dem inga^entiggen iare, do man zalt von gottes geburt drvzehin hundurt [iar]^f), dar nach in dem ain vnd zwainzigenstum iare, da zugegun warunt her Eglof von Roschach⁹ kilher ze Hagun[wil]^f)10, Hanrich der Ôm¹¹ vnd^g) Cůnrat der Kuchimaister¹².

Source Fulltext: Chartularium Sangallense V, Nr. 3112, S. 400-401.