Allen den, die dissen brief lesent ald ho^erent lesen, tv^ot graue Kraft von Toggenburg chorherre ze Costentz, graue Friderich von Toggenburg chorherre ze Costentz vnd graue || Diethelen von Toggenburg¹, grauen Friderichz brv^oder, ein warz vrkvnde der dinge, die an disem brief geschriben stant. Wissint alle, die nv sint ald nah vnz werdent, daz || vor vnz gewesen sint V^olrich von Mvnchwille, Johanz vnd Cv^onrat von Mvnchwille² gebrv^oder vnd gabent vns vf frilich vnd letklich die vogtye, die si von vnz het||tont ze rehtem manlehen vf den Eggon³, ze Manbrehtswille⁴, an Eberhartz hůbe⁵ vnd dez Hauenerzegge⁵. Vnd wan der vorgenemt Cv^onrat von Mvnchwille ze sinen tagen nit komen was, do wart im ze rehtem vogt gegen sin vetter her Johanz von Mvnchwille⁶ ritter, mit des hant gab er die vorgenemt lehenschaft vf an vnser hant, dar nach baten vns die selben von Mvnchwille, das wir die aigenschaft der vorgenemtvn vogtye wo^eltin gen immer dur ir dienst vnd ze vorderost dvrch gôt dem erbern closter ze Maggeno^vwe⁷ des ordenz von Zitêl, won die fro^vwan von Maggeno^vwe hettint enphangen ze ir samnung zw^o jvngfro^vwan geswesteran der vorgenemter von Mvnchwille⁸, der bette berieten wir vns mit den, die vnser ratgeben sint mit truwen ze allen vnseren sachen, vnd sahen an vor allen dingen die zvht vnd den gaischlichen wandel, die ze dem vorgenemten closter ze Maggeno^vwe sint. Vnd gaben vf ainmvtklich vnser aigenschaft, die wir hettont an der vorgenemtvn lehenschaft, die die vorgenemten von Mvnchwille von vnz hettont, dem vorgenemten closter von Maggeno^vwe eweklich ze hanne vnd ze niessent an der erber gaischlicher fro^vwn hant swester Magaretvn^a) von Ramenswag a^eptissen ze Maggeno^vwe⁹, dv selbe vogtye ist o^vch genemt ia^erlichen an gvlt vmbe vier phvnt Costenter^a) mvnze siben Schilling minr. Wir veriehen o^vch, daz wir dise gift getan habint dem vorgenemten closter mit allen den worten vnd mit allen den geta^eten, die von reht||
ald von gewonhait dar zv^o nvtz mohtont sin. Vnd ze ainem vrkvnde vnd ze gantzer sicherhait allez dez, so da vor geschriben stat, so henken wir die vorgenemten von Toggenburg vnserv insigel an disen brief. Wir die vorgenemten V^olrich, Johanz vnd Cv^onrat von Mvnchwille gebrv^oder veriehen o^vch allez des, so da vor geschriben stat, vnd henke o^vch ich V^olrich von Mvnchwille dar vmbe min insigel an disen brief. Wir Johanz vnd Cv^onrat von Mvnchwille die vorgenemten, won wir aigenre insigel nit enhant, veriehen o^vch vnder den vorgenemten insigeln vnd o^vch vnder vnserz vettern hern Johanz von Mvnchwille insigel des vorgenemten alles des, so da vor geschriben stat. Ich her Johanz von Mvnchwille vergihe o^vch allez dez, so da vorgeschriben stat, vnd henke o^vch darvber min insigel an disen brief. Hie bi sint gewesen her Cv^onrat der lvpriester von Jonswille¹⁰, Rv^odolf von Edangswille¹¹, Rv^odolf vnd Johanz von Magoltsperg¹² gebrv^oder, Hainrich von Wiezinkon¹³, Herman der amman von Vtzena¹⁴ vnd ander erber lvt genv^og. Diz geschach ze Lvtispurch¹⁵ an der na^ehstvn mitchvn vor der hailigvn botton tag Symonis et Jvde, do man zalt von gottez gebvrt drvzehenhvndert jar, dar nach in dem zwainzigosten iar, indict. quarta.

Source Fulltext: Chartularium Sangallense V, Nr. 3109, S. 397-398.