Allen den, de disen brief sehent ald horrent lesen, kvnden wir Elizabet ebtischina vnd ge||menlich der conuent von Wûrenspach¹ des ordens von Zitels, das swester Mezzi von Brucca² ko^vfet || hat ain halb jvkertvn rêben an Horenlein³, de da buwet Rv^odolf lcinkon⁴, desi vnserem gozhûse || eigenlich dur got vnd iro vnd aller ir vordren sêl willen geben hat de ze hanne vnd ze besizzenne vnd eweklich ze nesenne, vnd hat gesezzet svnderbarlich von der halbvn jvkertvn zwên eimer lvters wines ierlichs dem conuent an sechs iarziten ze iechlihem zehen kopphe ze teilenne, vnd bat vns flelich, das wir dv jarzit begiengen dur got, als sis gesezzet vnd geordenet hetti, vnd hein o^vch wir iro das gelopt ze tvnne. Das erste jârzit ist an dem fvnftem tage ze inge^endem brahot, ir vatters Walthers von Brvcca. Das ander ist an dem nvndem tage des selben manotz, ir basvn swester Mechthilt von Brucca. Das dritta an sant Laurenciun tage, heren R. von Wettingen⁵ des lutpriesters. Das vierda an sant Nycolaus abent, ir mv^oter Benignvn. Das fvnfta an aller selvn tage, ir swester Itv^on vnd Gerdrutvn. Das sechta ir jarzit lebende als si wil, nach dem to^vde als es gevalt. Swas aber an den selben reben wines mê ierlichs wirt, der sol des conuentz sin, vnd svlen den niesen, als es in wol kvnt. Alles das he geschriben ist, han wir gelopt vnd lobens o^vch an disem brieve, das ze volleistenne mit go^vter trvwe, vnd bindin o^vch dar zv^o alle vnser nakomen. Vnd das dis bi vns stêt belibe âne allen kranc, so geben wir iro disen brief ze einer sikerheit besigelt offenlich mit vnserem ingesigil. Dis beschac ze Wurenspach, do von gottes geburte waren drvzehenhvndert jar vnd eis vnd zwenzig jar, an dem zwelftem tage.

Source Fulltext: Chartularium Sangallense V, Nr. 3113, S. 401.