Wir graue Hug von Werdenberch¹ kunden vnd veriechen offenlich an disem briefe allen || den, die in sehent lesent alder ho^erent, daz wir schuldig sien vnd gelten sulen recht || vnd redelich vnserm lieben vnd getriwen dienaer Herman Philippen von Rinegge² vnd allen || sinen erbon, ob er enwaere aeinlif marke gůtes vnd lo^etiges Silbers Chostentzer gewaeges vmbe den dienst, den er vns getan hat vnd noch tůn sol, vnd haben im vmb daz vorgenante gůt alles gesetzzet recht vnd redelich vnd zů aeinem rechten wernden phande, als man aein werndes phant von recht setzzen sol, sechs scheffel korn hofmess vnd aein phunt Chostentzer phenninge gewonlicher munse aelliu jare geltes vs dem hof ze Lvsteno^vwe³, also daz er alder sin erben daz vorgeschoben gelt vs dem vorbenenten hof ze Lvsteno^vwe aelliu jare als lange nemen sol, alle die wile er alder sin erben dez vorbenenten silbers vngewert sint. Wir son o^vch vnd vnser nachcomen sin vnd siner erbon dez vorgeschriben phandes wem sin, tůn wir dez nit, so son wir vnd vnser erben in die vorbenenten aeinlif mark richten vnd geben an allen furzuch. Vnd daz in daz staete vnd gantz von vns vnd vnseren nachkomen belibe, dar vmbe so geben wir der vorgeschriben graue Hug dem vorbenenten Herman vnd sinen erbon disen brief besigelten mit vnserm insigel ze einem staeten vnd gewaern vrkunde aller der dinge vnd gedinge, diu hie vorgeschriben sint. Daz geschach vnd dirre brief wart gegeben ze Rinegge vf der burch, do von Christes geburte warent tusent jare, driu hundert jare vnd in den driu vnd zwaeinzigosten jaren, an sant Bartholomeus tage.

Source Fulltext: Chartularium Sangallense V, Nr. 3190, S. 455.