Allen dien, die disen gegenwurtigen brief ansehent lesent oder ho^errent lesen, kundent || vnd furiehent wir Wilnhelm vnd Berhtolt von Staina gebrůder, das wir dem erbern || manne Cůnraten Arnoltz burger ze sant Gallen reht vnd redlich ze ko^vfen geben haint || den wingarten ze Obernstaina bi der Ahe¹ mit allen dien nutzen vnd rehten, so dar zů ho^errent, mit muran vnd zunne, die dar vmbe gant, vnd mit allem||
dem vollekomendem rehte, als wir in hetten, also das der zehent des selben wingarten ainen bischof von Costentzan ho^erren sol, vnd haben dar vmb von ime enphangen sehzig mark lo^etiges silbers Costenzer gewiht, der er vns vo^elleclich gewert hat vnd in||
vnser offenber nutz kumen sint. Wir furiehent o^vch offenlich an disem brief, das wir vnd vnser erber^a) des vorgeschriben Cůnrat Arnoltz vnd siner erben warn sullen sin nah reht vmb den vorgenenten wingarten ze Obernstaina an weltlichem vnd gaischlichem gerihte vnd swa er sin bedurfent ist. Vnd das dis alles war sie vnd sta^et belibe von vns vnd vnsera erbern^a), so geben wir dem vorgenemten Cůnrat Arnoltz disen||
brief besigelt mit vnser baider insigel. Das beschah ze sant Gallen vnd wart dirre brief geben an dem na^ehsten zinstag nah sant Lucien tag, do man zalt von gottes geburt druzehen hundert iar, darnah in dem sehsten vnd zwaingesten^b) jare.

Source Fulltext: Chartularium Sangallense V, Nr. 3298, S. 524.