Allen den, die disen brief ansehent, lesent oder ho^errent lesen, kúnde ich V^olrich von Gossowe¹, dem man sprichet || zůnamen Strubv^olrich, vnd vergich offenlich fúr mich vnd fúr min erben, wie sú danne sien oder werden genant, || es sien knaben oder tohteren, daz ich mit bedahtem můt frilich vnd vnbetwungenlich mich gar vnd gantzlich enzi||gen han vnd mich enzîhe luterlich aller der ansprach vnd aller der klag, die ich oder min erben vntz an disen hútigen tag haben oder haben mugen, gegen dem êrsamen gaistlichen herren hern Vlrich von gotes willen abte des gotzhuses ze sant Blasien in dem Swarzwalt², gegen sinen nachkomenne, gegen dem vorgenanten gotzhus vnd gegen Cůnr. saligen von Rossewang(en)^a)3, der wilunt vnser probst⁴ was ze Clingenowe⁵, kinden, es sie von koufes wegen, von gâb wegen, von lihenne, von vˆssenemenne, von zerung, von bruch oder von kain anderen schulden. Ich vergich o^vch offenlich an disem brief, das ich minen^b) herren dem vorgenanten abt V^olrichen luterlich vnd ledeklich mit gůter betrahtung hab vˆff gegeben das hûs, das gelegen ist ze Baden⁶ obenen in der stat, das des vorgeschribenen gotzhus von sant Blasien reht aigen ist vnd mir vnd minen erben zehen jar gelihen was vmb ainen gewússen ja^erlichen zins zehen schilling phennige Baseler múntze. Das selbe hus sol das vorgenant gotzhus ze sant Blasien nach allem sinem willen besetzzen vnd entsetzzen, lihen vnd niessen ane alle widerred min oder miner erben. Vnd das dis alles wâr sie vnd sta^ete belibe, so gib ich dem vorgenanten gotzhus ze sant Blasien disen brief besigelt mit minen^b) ingesigel. Dirre brief wart geben ze sant Blasien in dem closter des jares, do^c) man zalt von Cristes geburt drúzehenhundert jar, dar nach in dem sibenden vnd zwainzigesten jar, an dem sunnentag vor mittem ho^eumanet, da ze gegen waren dis ersamen lút, die hie nach geschriben stant, maister Vlr. von sant Gallen⁷, brůder Joh. probst ze Cling(enowe), Cůnr. der kamerer von sant Blasien, H. der probst von Basel⁸ vnd ander erber lút genúg.

Source Fulltext: Chartularium Sangallense VI, Nr. 3318, S. 17.