Wir Hiltpolt von gottes genaden abt des gotzhus von sant Gallen¹ tu^egen kunt allen dien, die disen || brief ansehent lesent oder ho^erent lesen, das wir raiten an sant Thomas abent mit Cůnratem || dem Kuchimaister amman ze Appacelle² alles, das er vnz an den tag von v´nsern wegen ingenomen vnd || vsgeben hette. Vnd nah der raitung beliben wir ime schuldig zwainzig pfunt vnd aht schillinge pfenning. Dar zů leh er v´ns zwelf pfunt pfenning an der gúlt, die wir dem Stokker solten. Vnd vmb die vorgenemten pfenning haben wir ime versetzet vsser dem ampt ze Appacelle stúran, cinse, va^elle, gelest, gerihte vnd alle nútz, die wir haben in dem land ze Appacelle, an das burgesse^a), ia^erlich ze niessen vnd ze na^emen, vnz er oder sin erben der zwai vnd drisseg pfunt vnd aht schilling pfenning gar vnd ga^enzlich gewert werdent. Vnd das dis alles war sie vnd sta^et belibe, dar vmb geben wir ime disen brief besigelt mit v´nserm insigel. Dú raitung beschah vnd wart dirre brief geben ze sant Gallen, do man zalt von gottes gebúrt drúzehenhundert jar, dar nah in dem sibenden vnd zwainzigesten jare, an sant Thomas abent.

Source Fulltext: Chartularium Sangallense VI, Nr. 3335, S. 26-27.