Ich Diethalm von Mose¹ vergich vnd tůn kunt allen den, die disen brief sehent lesent oder ho^erent lesen, || daz min genaedige herre von gotz genaden apt Hiltplt.² apt dez gotzhus von sant Gallen mit mir dez v´ber||ain ist komen fúr sich vnd sin nachkomen lieplich vnd minclich, daz er mir ain mark geltes an laigen lehen || lihen sol, er habe sie inhendez oder er koffe sie ald sú werd im ledig nu ze mal oder her nach, vnd beschaech, daz ain stosse dar vmbe wurde von ime oder sinen nachkomen vnd von mir, daz ich spraeche, ich wil an der stet oder die mark geltes nicht nemen, so sol der stosse vnd dirre kriek stan vf disen ersamen lúten hern Amor von Luterberg³, Amor von Horwun⁴, Hainr. von Leonberg⁵, vnd wenne die drige sprechent, ich so^el an der stet nemen oder ich sige mit der mark geltes, die mir min herre apt Hiltplt. da vor genemte oder sin nachkome, wer der ist, bútet vnd lihet, gewert, so sol ich gewert sin der mark geltes, alz da vor geschriben ist, vnd sol och den vrsatz ledig lassen, den ich habe vs dem zehenden ze Wil⁶, zehen stukke kernen Wiler messes, an allen fúrzug, vnd waz ich brief dar vmbe habe, wie die standen, die súlen mich nicht^a) schirmen noch kain helfe tůn vmbe die sache, vnd sol der selbe brief⁷ mines herren apt Hiltpltz. da vor genemt an alle kraft sin vmbe die mark geltes gen ime vnd sinen nachkomen an alle wider rede, beschaech och, daz der drigen ainer oder mer oder sie alle ab giengen, daz got wende, so sol min herre apt Hiltplt. oder sin nachkome, wer der ist, vnd ich ane geuaerde ainen oder zwen oder drige alz schidlich dar gen, alz die ab gangen sint, vnd bin den och allez dez gebunden vmbe die vor geschriben mark geltes alz den vor genemten hern Amor von Luterberg, Amor von Horwun, Hainr. von Leonberg. Vnd daz diz war sige vnd staete belibe, dar vmbe so gip ich Diethlm. von Mose da vor genemte disen brief besigelt mit minem insigel. Diz beschach vnd wart dirre brief geben ze sant Gallen, an sant Afren tag, do man zalt von gotz gebúrte drúzehen hundert iar, dar nach in dem núnden vnd zwainzegesten jar.

Source Fulltext: Chartularium Sangallense VI, Nr. 3389, S. 62-63.