Allen den, die disen gegenwúrtigen brief an sehent oder ho^erent lesen, kúnd ich her V^olrich von Ende probst dez gotzhus von || sant Gallen¹, daz Dietrich von Rúti ein edel man von dem selben gotzhus von sant Gallen ze erbe hatte dú gu^eter, || die hie nâch geschriben stânt vnd in den kelnhof ze Rôrbach ho^erent, vnd mir dú vˆf gab lidig vnde lere, vnd ich dú || han verlúhen an dez vorgenanten gotzhus stat von sant Gallen dien gêistlichen herren . . dem apte vnd . . dem conuente dez gotzhus von sant Vrban dez ordens von Cytels Costenzer bistůms ze eim rechten erbe, alsô daz daz selbe erbe sol eine tragen, der irs samenunges si, vnd emphahen, als es^a) ietze von mir emphangen het vnd treit brůder V^olrich von Sopensê ein múnch ze sant Vrban, vnd swenne der enist, so sols aber ein andere, der ez von sime apte geheissen wirt, von mir oder von dem, der denne an eins probstes stette dez egenanten^b) hofskeller von Rôrbach ist, emphahen vnde tragen an irs gotzhus stât vnd sol als vil erschatz geben, als dez selben hofes gewonheit ist. Vnd sint diz dú gu^eter, die der vorgenante brůder V^olr. enphangen het, ze Rôrbach fúnf schůpassen, der buwet einen V^olr. Kolmer, V^olrich Grůner buwet ir zwô vnd Heinr. Wisse o^vch zwô, ze Steinriet bi Rôrbach ein schůpasse, die buwet Peter Ganzenberg, vnd ze Brugken ein gůt, daz Dietrich von Rúti selber hat, vnd ze Liebenberg ein gůt, daz buwet V^olr. Hetzel, im Glasebach ein gůt heisset an der Matten, daz buwent Wernher vnd Chu^enzi vnd Nikli an der Matten, vnd den zehenden ze Betzlisperg vnd den zehenden ze Ganzenberg, vnd geltent dise gu^eter alle ierglichs dem vorgenanten vnserm gotzhus von sant Gallen ze zinse vier phenninge vnd núnzehen schillinge. Vnd harúber ze einem vrkúnde vnde sicherheit so het der vorgenante Dietrich von Rúti sin ingesigel zv^o minem gehenket an disen brief. Der gegeben wart ze Rôrbach,do man von gottez gebúrte zalte drúzehenhundert jâr, dar nach in dem drissigosten jâre, an dem nechsten zistage vor^c) dem palme tage.

Source Fulltext: Chartularium Sangallense VI, Nr. 3403, S. 72.