Wir Johans graf von Habspurch¹ veriehen vnd tůn chunt offenlich mit disem brief allen den, die in ansehent lesent oder ho^erent lesen, daz wir mit || dem hohgepornen fursten vnserm liben herren hertzog Otten von O^esterrich vnd von Styr, grauen ze Habspurg vnd ze Chyburg vnd lantgrauen in Elsazze, || von sin selbes vnd von sines brůder hertzog Albr.² wegen vberein chomen sin vnd liblich vnd gu^etlich berihtet vmb die ansprache, die vnser herre selig hertzog Lupolt || von O^esterr.³ vnd von Styr von sinen vnd siner brůder wegen gen vns gehebt hat vmb di gůt, lút vnd rehtunge, die graf Wernli selig grafen Wernhers von Homberg seligen svn⁴ gelazzen hat, die er ze lehen hatt von den goteshusern von Owe⁵, von sand Gallen, von den Einsideln⁶ vnd von Pfeuers⁷, als der vorgnant vnser herre hertzog Lupolt selig di vorgnanten gu^eter lut vnd rehtunge vf den lanttagen vnd lantgerihten benemet bechlegt vnd behabt hat, also daz wir die March⁸, da di alt Raprehtswilr⁹ inne lit, vnd alle di gu^eter, di dishalb sewes¹⁰ ligent, von swelhen gotshusern wir di ze lehen han, den selben gotshusern vf geben haben, vnd baten di selben gu^eter lihen ze rehtem lehen dem egenanten hertzog Ott. vnd sinem brůder vnd iren erben, vnd enpfiengen wir die selben gu^eter lut vnd rehtunge vns vnd vnsern liberben svnen vnd to^ehtern von dem vorgnanten hertzog Ott. an siner vnd sins brůder stat ze rehtem lehen. Wir haben ouch daz vnser rehtez aigen ist, di egenanten burg di alten Raprehtswilre vnd di gegent in der Wegi¹¹ ledichlich vnd vrilich vfgeben mit der eigenschaft mit nvtzen vnd mit rehten, als wir vnd vnser vordern di her braht haben, dem egenanten vnserm herren hertzog Ott. vnd sinem brůder vnd iren erben vnd inen geeigent mit aller ehafti vnd notdurft, so dar zů ho^eret, vnd haben di selben purch vnd gegend mit allen rehten, als vorgeschriben stat, von dem vorbenemten vnserm herren hertzog Ott. vnd sinem brůder hertzog Albr. vns vnd vnsern erben sv´nen vnd tohteren empfangen ze rehtem lehen¹². Wir haben vns ouch entzigen aller der rehten, di wir hatten oder gehaben mohten von gemechte von lehenschaft oder von dheinen andern sachen an den drîen burgen, di man heizzet Warttemberg¹³ ob Basel, vnd an luten vnd an rehten vnd an gu^etern, die dar zů gehorent, vnd haben di vrilich vnd ledichlich gegeben den vorgeschriben vnsern herren hertzog Ott. vnd hertzog Albr. sinem brůder vnd geuertiget von dem bischof von Strazburg¹⁴ mit aller ehafti, notdurft vnd gult, so dar zů gehoret, daz wir vnd vnser erben niemerme dhein ansprache dar an haben sullen in dheinen weg, vnd daz dise vorgeschriben taiding vnd rihtigung den ebenanten vnsern herren hertzog Ott. vnd sinem brůder vnd ir erben von vns vnd vnsern erben iemerme stet vnd vnzerbrochen beliben, des haben wir zů den heiligen gesworn, vnd dar vber zů einem offen vrchund vnd gezugnusse geben wir disen brief versigelt mit vnserm insigel. Der ist geben ze Brukke¹⁵ an samztag nach des hiligen^a) chrvtzes tag ze herbst, do man zalt von Christs geburt drvzehen hundert iar, dar nach in dem drizzigsten iar.

Source Fulltext: Chartularium Sangallense VI, Nr. 3427, S. 92-93.