Wir . . der official dez hofes ze Kostentz kúnden vnd offenen allen den, die disen brief sehent oder ho^erent lesen, daz fúr v´ns kam der erber man || Hainrich von Husen¹ burger ze Bischofcelle² V^olrichs sa^eligen sun von Husen vnd veriah offenlich vor geriht, daz er durh die ba^ette vnd orde||nung sines vatters sa^eligen dez vorgenanten V^olrichs vnd o^vch dur siner sêle hail allen den nutze, der gât vnd komen mag von dem kornzehen||den ze Sorental³, der wilent was V^olrichs von Múlinon⁴, vnd von dem gůt ze Oberndorf⁵, daz der vorgenant V^olrich sa^elig von Husen an in braht hat, hette gegeben vnd gab o^vch vor v´ns vˆf den gaischlichen frowan Margaretun vnd Elizabeth dez vorgenanten Hainrichs swestran klosterfrowan ze Maggeno^vwe⁶ des klosters gelegen in Kostentzer bistům in lipgedings reht vnd wîse, die wîl die swestran lebent vnuerschaidenlich, alle die wîl die swestran baide ald ir aintwedrú lebent, vnd daz er vnd alle sin erben nach der selben swestran tôde fu^egend vnd werbend sin súlnt âne alle geua^erde, daz dú êgenanten gu^eter lideklich komen mit allem reht von den lêhenherren der gu^eter vnd anderswâ, da ez nôtdúrftig ist, in dez vorgedahten gotzhus gwalt von Maggeno^vwe, vnd alle die wîl daz nit vollefu^ert sîe, daz die vorgeschribenen Hainrich vnd sin erben reht vnd getrúwe trager sin der selben gu^eter dez êgenanten klosters, alsô daz alle die nútze, die von den gu^etern koment, geantwúrt werden volleklich vnd lideklich berihtet . . der a^ebtischenne vnd . . dem conuent dez selben klosters, die danne lebend sint. Vnd alsô hat sich der vorgesprochen Hainrich an siner vnd aller siner erben statte entzigen vor v´ns als vor geriht alles dez rehtes, daz er ald sin erben hatten ald gehaben mohtent an den vorgenanten nútzen vnd o^vch den gu^etern. Vnd gab der selb Hainrich v´ns sin trúwe in aides wîse, a^ellú dú vorgeschribenen ding sta^ete vnd vnwandelber ze habende vnd ze vollefu^erende baidú mit im selben vnd mit allen sinen erben vnd niemer da wider ze komenne von dehainer slaht sache, wie dú genemmet mo^eht werden, ân alle geua^erde. Vnd daz alles, daz hie vor geschriben stat, sicher vnd vnwandelber belibe, so haben wir v´nsers houes insigel durh dez vorgenanten Hainrichs ba^ette mit des selben Hainrichs insigel gehenket an disen brief. Ich der vorgesprochen Hainrich von Husen vergih offenlich an disem brief, daz ich můtwilleklich vnd bedahtklich von den vorgeschribenen sachen kam fúr den êrwirdigen hêrren . . den vorgenanten official dez houes ze Kostentz, vnd vor dem als vor geriht veriah offenlich a^ellú dú vorgeschribenen ding vnd band mich vnd alle min erben vor dem vnd bind o^vch mich vnd si mit disem brief, dú selben ding a^ellú sta^et vnd vnwandelber ze habende vnd o^vch ze vollefu^erende vnd schaffenne ze vollefu^erende mit gantzen trúwan vnd niemer dâ wider ze komenne ân alle geua^erde, vnd daz ich dar vmb min trúwe gegeben hân in aides wîse dem vorgeschribenen official an dez gerihtes statte. Vnd ze ainer wârhait der selben dinge so henk ich min insigel mit dez vorgedahten officials insigel, den ich dar vmb flisseklich gebetten han, an disen brief. Diz beschah vnd wart der brief geben ze Kostentz in dem jar, do man zalt von gotz gebúrt drúzehenhundert jar, dar nah in dem drissegesten jar, an dem nehsten fritag nach sant Martins tag.

Source Fulltext: Chartularium Sangallense VI, Nr. 3433, S. 96.