Wir Ludowig von gotes gnaden Romischer cheyser ze allen ziten merer dez || richs veriehen offenlichen an disem brief, daz wir dem vesten manne Vlrichen von Ku^e||nigsecke¹ vnserm lieben getriwen vnd sinen erben schuldig worden sin vnd gelten sullen ah||zig marck silbers vmbe ein roz vnd vmb einen maidem, die er vns dar vmbe ze ko^vffen hat gegeben. Vnd slahen ime die selben achzig march vf div phant, die er vormalns von vns hat², daz ist vf die vogtay dez hofs ze Trogen³, also daz der vorgenant Vlr. vnd sin erben div egenanten vogtay ze Trogen inne haben sullen vnd niezzen mit allen nútzen, eren, rehten, besuhten vnd unbesuhten, vnd mit allem rehten, swie daz genant ist, als lange, biz wir oder vnser nahkomen an dem riche div vorgenanten vogtay von ine erlo^esen vmbe die vordern schulde nah der selben brief sage vnd vmbe die vorgenanten ahzig marck gar vnd gentzlichen. Vnd dar vber ze einem vrchúnde geben wir ime disen brief mit vnserm cheyserlichem insigel besigelten. Der geben ist ze Rauenspurg⁴, an dinstag nah dem phingstage, da man zalt von Christes geburd driuzehen hundert iar, dar nah in dem zwai vnd dreizzigestim iar, in dem ahzehendem iar vnsers richs vnd in dem funften dez cheysertumes.

Source Fulltext: Chartularium Sangallense VI, Nr. 3497, S. 145-146.