Dilecto filio Hermanno de Bonisteren^a) abbati monasterii sancti Galli ordinis sancti Benedicti Constanciensis diocesis salutem etc. Summi dispositione rectoris ad regimen universalis ecclesie deputati curis assiduis angimur, ut opem et operam, quantum nobis ex alto conceditur, impendamus, ut orbis ecclesie et monasteria universa pastorum solatio destituta per nostre providentie ministerium viris ydoneis committantur, qui sciant velint et valeant ecclesias et monasteria ipsa eis commissa studiose regere prudenter dirigere ac feliciter^b) gubernare. Dudum siquidem monasterio sancti Galli ordinis sancti Benedicti Constanciensis diocesis per obitum quondam Hilpoldi abbatis eiusdem monasterii, qui extra Romanam curiam diem clausit extremum, abbatis regimine destituto, nos huiusmodi vacatione ipsius monasterii fidedignis relatibus intellecta cupientes ad eius regimen personam ydoneam nostre operationis ministerio presidere, provisionem eiusdem monasterii ea vice ordinationi et dispositioni nostre duximus specialiter reservandam, decernendo extunc irritum et inane, si secus super hiis per quoscumque quavis auctoritate scienter vel ignoranter contingeret attemptari, ac deinde monasterium ipsum, de^c) quo nullus preter nos se ea vice post reservationem et decretum predicta intromittere poterat, ex certis causis tunc expressis Rodolpho episcopo Constanciensi usque ad nostrum et sedis apostolice beneplacitum duximus commendandum, et subsequenter ex aliis iustis causis eiusdem monasterii predicta revocata commenda de tue fidelitatis et circumspectionis industria plenam in domino fiduciam obtinentes ipsum monasterium tibi simili modo duximus commendandum¹. Nosque deinde, antequam tu^d) cepisses regimen huiusmodi exercere, reputantes utilius, quod monasterium ipsum proprii pastoris presidio fulciretur, de provisione utili ipsius monasterii solicite cogitantes post deliberationem, quam ad preficiendum dicto monasterio personam utilem ac etiam fructuosam cum nostris fratribus habuimus diligentem, demum ad te tunc monachum monasterii Heremitarum ordinis et diocesis predictorum ordinem ipsum expresse professum et in sacerdocio constitutum, cui de religionis zelo vite mundicia honestate morum prudentia spiritualium et temporalium providentia apud nos fidedigna testimonia perhibentur, direximus aciem nostre mentis, quibus omnibus debita meditatione discussis de persona tua dicto monasterio sancti Galli de ipsorum fratrum consilio auctoritate apostolica providemus teque illi preficimus in abbatem curam et administrationem ipsius tibi tam in spiritualibus quam in temporalibus plenarie committendo, in eo, qui dat gratias et largitur premia, confidentes, quod idem monasterium sancti Galli per tue circumspectionis et diligentie fructuosum studium^e) dextera tibi domini^f) assistente propicia spiritualiter et temporaliter regetur utiliter et prospere dirigetur. Quocirca discretioni^g) tue per apostolica scripta mandamus, quatinus onus regiminis dicti monasterii sancti Galli suscipiens reverenter sic te in eo salubriter exercendo exhibeas studiosum, quod per laudabilis tue diligentie studium prefatum monasterium sancti Galli preservetur a noxiis et ad salutaria dirigatur tuque proinde retributionis eterne premium et nostram ac dicte sedis benedictionem et gratiam uberius consequi merearis. Datum Auinione XVIIII. kl.^h) ianuarii, anno XVIII. § In eundem modum dilectis filiis conventui monasterii sancti Galli ordinis sancti Benedicti Constanciensis diocesis salutem etc. Summi dispositione rectoris etc. ut in proxima superiori usque prospere dirigetur. Quocirca universitati vestre per apostolica scripta mandamus, quatinus eundem abbatem tanquam patrem et pastorem animarum vestrarum devote recipientes et honorifice tractantes ac exhibentes ei obedientiam et reverentiam debitam et devotam eius salubria monita et mandata suscipiatis ilariter et efficaciter adimplere curetis, alioquin sentenciam, quam idem abbas rite tulerit in rebelles, ratam habebimus et faciemus auctore domino usque ad satisfactionem condignam inviolabiliter observari. Datum ut supra.

Source Fulltext: Chartularium Sangallense VI, Nr. 3533, S. 176-178.