Wir Ludowig von gots genaden Romischer keyser ze allen ziten merer des richs tun chunt allen den, die disen^a) || sehent oder horent lesen, wann kunig Rudolf vnser voruar vnd anherre dem vesten manne Chunr. dem || schenchen weylent von Landegg¹ die vogtay vber den hof ze Scheftnawe fu^er dreizzig march silbers || versetzet het, so slahen wir Liutolden vnd Chunr. seinen su^enen schenchen von Landegg auf die selben vogtay vber den hof ze Scheftnawe zu den dreizzig marchen hundert march silbers vmb die dinst, die si vns vnd dem riche getan habent vnd noch tun sullen vnd mugen. Vnd wellen, daz si die selben vogtay inne haben vnd niezzen mit allen rehten vnd nutzen, die dar zů gehorent vnd da von geuallen mugen, als lange vntz wir oder vnser nachomen an dem riche kunig oder keyser die selben vogtay von in oder von irn erben vmb die dreizzig march vnd hundert march silbers ga^entzlich erledigen vnd erlosen. Vnd dar vber ze vrchunde geben wir in disen brief versigelten mit vnserm keyserlichem insigel. Der geben ist ze Hagenowe² an dem vreytag nach sand Gallen tag, da man zalt von Christus gebu^ert driutzehenhundert iar, darnach in dem dritten vnd dreizzigstem iar, in dem niwenzehenden iar vnsers richs vnd in dem sechsten des keysertums.

Source Fulltext: Chartularium Sangallense VI, Nr. 3529, S. 174.