Dilecto filio Hermanno de Bunsteten¹ monacho monasterii Heremitarum² ordinis sancti Benedicti Constantiensis diocesis administratori monasterii sancti Galli eorumdem ordinis et diocesis in spiritualibus et temporalibus auctoritate apostolica deputato. Apostolice servitutis iniuncte nobis desuper officium nos solicitat et perurget, ut ecclesiarum et monasteriorum illorum presertim, que propriis carent pastoribus, providere indempnitatibus procuremus. Dudum siquidem monasterio sancti Galli ordinis sancti Benedicti Constantiensis diocesis, in quo per dilectos filios conventum ipsius fuisse dicebatur electio in discordia celebrata, vacante, sicut adhuc vacare noscitur, per obitum quondam Luppoldi^a)3 abbatis monasterii prelibati, nos attendentes, quod iddem monasterium occasione huiusmodi discordie variis poterat presertim vigente temporis malicia incomodis pregravari, ut preservaretur ab illis, prefati monasterii provisionem ex premissis et aliis certis causis rationabilibus ad hoc nostrum moventibus animum nobis et apostolice sedi ea vice duxeramus specialiter auctoritate apostolica reservandam, decernentes extunc irritum et inane, si secus per quoscumque quavis auctoritate scienter vel ignoranter contigeret super hiis attemptari, ipsique venerabili fratri nostro Rudolpho episcopo Constantiensi⁴ administrationem plenam generalem et liberam in spiritualibus et temporalibus gerendam per ipsum vel de mandato suo per alium vel alios eius nomine, quousque aliter ordinaremus, super hoc per nostras certi tenoris litteras duximus commendandam⁵, ordinandi statuendi faciendi gerendi et plenarie in spiritualibus et temporalibus exercendi omnia et singula, que ad liberam administrationem et bonum statum ipsius monasterii ac eius iurium et pertinentiarum alienatione tamen bonorum immobilium penitus interdicta pertinere cognoscent, eidem nichilominus plenaria potestate concessa, sicut in eisdem litteris plenius continetur. Sane cum ex certis causis ad nos postmodum supervenientibus nos velimus de eodem monasterio aliter ordinare, nos dictam commendam et eius effectum ex certa scientia penitus revocantes⁶ ac gerentes de tue fidelitatis et circumspectionis prudentia, super quibus apud nos laudabile perhibetur testimonium, in domino fiduciam pleniorem et sperantes, quod per tuam solicitudinem monasterium ipsum poterit actore domino preservari a noxiis ac commodis spiritualibus et temporalibus ampliari, eiusdem monasterii administrationem plenam generalem et liberam in spiritualibus et temporalibus tibi tenore presentium usque ad nostrum et apostolice sedis beneplacitum auctoritate apostolica commendamus, ordinandi statuendi reformandi faciendi gerendi et plenarie exercendi omnia et singula, que ad liberam administrationem et bonum statum eiusdem monasterii iurium et pertinentiarum predictorum pertinere noscuntur, contradictores quoque quoslibet et rebelles per censuram ecclesiasticam appellatione postposita compescendi, alienatione tamen bonorum immobilium ipsius monasterii penitus interdicta, facultatem tibi plenam et liberam concedentes. Sic itaque curam et administrationem huiusmodi gerere studeas solicite fideliter et prudenter circa recuperationem et defensionem iurium eiusdem monasterii studium attente solicitudinis adhibendo, quod a retributore bonorum omnium retributionis eterne assequi premium merearis. Nosque tuam debeamus in domino diligentiam propter hoc merito commendare. Datum Auinione VIII. kl. novembris anno XVIII.

Source Fulltext: Chartularium Sangallense VI, Nr. 3530, S. 174-175.