Allen den, die disen brief ansehent, lesent alder ho^erent lesen, tůn kunt ich Bilgri von Tobel¹ ritter mit rehter || vergiht, daz ich dem erwirdigen herren grauen Albreht von Werdenberg² vnd allen sinen erben han ze ko^vffend ge||geben mit allem reht alle die aigenschaft, die ich het ald han solt an der wis vnd an allen gu^etern, die Herman || Philippe von Rinegge³ von mir ze lehen het ald haben solt, vnd alles daz gůt, daz Wernher vnd V^olrich gebrůder von Tale⁴ vnd Dietrich von Vnderach⁵ vnd sin brůder von mir ze lehen hêttend, vnd v´ber al alles daz gůt vnd dv´ gu^eter, die ze Rinegge in der stat ald vor der stat vnd ze Tal in dem dorf ald vmb daz dorf vnd ze Vnderach in dem dorf vnd vor dem dorf von mir lehen ist gesin ald solt sin, swie es von minen vorderen an mich herbraht ist von reht ald von gwonhait, gesůchtz vnd vngesůchtz, vmb zwainzig phunt phenninge Costenzer múnze gůter vnd genger, die ich dar vmb enphangen han vnd bekert in minen nutz, vnd verzihe mich fúr mich vnd alle min erben aller der reht vnd gwonhait, die ich vntz her dar an hette ald haben solt, vnd aller ansprach vnd vorderung gen im vnd sinen erben, da mit er ald sv´ an gaistlichem ald an weltlichem geriht an den vorgenanten gu^etern bekrenket mo^ehten werden. Vnd daz dis sicher vnd staete belibe, gib ich disen brief fúr mich vnd min erben besigelten mit minem aigenen insigel dem vorgenemten erwirdigen herren grauen Albrecht vnd allen sinen erben ze ainem vrkv´nde der vorgeschribenen dinge. Bi disem ko^vffe warent erba^er lút, die sin gezúge sint, die hie nach geschriben sint, her V^olrich Hv´rling ritter⁶, Wernher von Berg⁷, Philippe von Dancratzwiler⁸ edel kneht, Eberhart Sumerlo^vp amman ze dem Hailigenberg⁹ vnd ander frume lút. Dis geschach vnd wart o^vch diser brief gegeben zem Hailigenberg in der burg in dem jar, do man zalt von Cristes geburt drúzehen hundert jar vnd dar nach in dem vier vnd drissigosten jar an aller hailigen tag.

Source Fulltext: Chartularium Sangallense VI, Nr. 3566, S. 198.