Wir graue Kraft von Tocgemburg probst der kilchen ze der probstey Zúrich kunden allen den, die disen brief sehent oder ho^erent lesen, vnd veriehen offenlich vmb den hof ze Erlibach bi Zúrichse, den vns vnser lieber o^ehein graue Johans von Habspurg mit der vogtey, mit gerichten, mit twingen mit bennen, mit lúten, mit gu^etern vnd mit allem rechte, so dar zů geho^ert, mit der hant gunst vnd gůtem willen des erwirdigen herren apt Chůnr. des gotzhuses von Einsidellen in vnser hant vnd in vnser gewer ze rechtem pfande versetzet hat fúr hundert mark vnd siben vnd drissig mark gůtes silbers Zúricher gewichte, als die brieue wol bewisent, die vns dar vber geben sint, das wir da loben an disem brieue fúr vns vnd vnser erben, die wir hie zv^o binden, swanne das ist, das vns der vorgenande vnser o^ehein von Habspurg oder sin erben, ob er enwere, ermanent mit hundert marken vnd mit siben vnd drissig marken gůtes silbers Zúricher gewicht, das wir oder vnser erben oder die, ob wir den vorgeschriben pfantschatz des hoves ze Erlibach ieman fúrbas gefu^eget haben, den selben pfantschatz mit lúten, mit gu^etern vnd mit allem dem rechte, so dar zů geho^ert vnd als er o^vch in vnser hant vnd gewalt komen ist, dem vorgenanden vnserm o^eheime von Habspurg oder des erben wider vf geben vnd vertigen súln mit aller der sicherheit vnd gewarsami worten vnd werken, so dar zů geho^ert vnd notdúrftig ist, ane allen fúrzug. Vnd hier vber zeiner waren vesten sicherheit so geben wir vnserm o^eheime von Habspurg vnd sinen erben disen brief mit vnserm insigel besigelt offenlich. Diser brief wart geben Zúrich an sant Valentins tage, in dem jare, do man von gottes gebúrte zalte drúcehen hundert jar vnd dar nach in dem fúnften vnd drissigosten jare.

Source Fulltext: Chartularium Sangallense VI, Nr. 3576, S. 205-206.